पोखरा (हाम्रो खेलकुद) – पर्यटकीय नगरी पोखरामा आयोजना हुने दोस्रो संस्करणको सभामुख कप राष्ट्रिय महिला भलिबल प्रतियोगिताको सम्पूर्ण तयारी पूरा भएको आयोजकले जानकारी गराएको छ ।

राष्ट्रिय खेलकुद परिषद (राखेप) को आयोजनामा तथा तथा पश्चिमाञ्चल क्षेत्रिय खेलकुद विकास समितीको संयोजन माघ १ देखि ५ गतेम्म हुने प्रतियोगिताको सम्पूर्ण तयारी पूरा भएको पश्चिमाञ्चल क्षेत्रिय खेलकुद विकास समितीका अध्यक्ष सम्पन्न श्रेष्ठले जानकारी गराए । प्रतियोगितामा तीन विभागीय ३ टोलीसहित सात प्रदेश गरी कुल १० टिमको सहभागिता रहनेछ ।

प्रतियोगिताको उद्घाटन खेलमा आयोजक गण्डकी प्रदेश र नेपाल पुलिस क्लबबीच खेल हुने आयोजकले जनाएको छ । प्रतियोगितामा सहभागी १० टोलीलाई चार समूहमा विभाजन गरिएको छ । समूह ‘ए’ मा डिफेन्डिङ च्याम्पियन नेपाल एपीएफ क्लब, प्रदेश नं १ र सुदुरपश्चिम प्रदेश रहेका छन् । समूह ‘बी’ मा प्रदेश नं ५ र प्रदेश नम्वर २ रहेका छन् । समूह ‘सी’ मा त्रिभुवन आर्मी क्लब र कर्णाली प्रदेश रहँदा समूह ‘डी’ मा नेपाल पुलिस क्लब र गण्डकी प्रदेश रहेका छन् । प्रतियोगितामा कुल १६ खेल हुनेछन् ।

प्रतियोगिता सम्पन्न गर्न ३८ लाख खर्च हुने आयोजकले अनुमान गरेको छ । प्रतियोगितामा विजेताले ३ लाख ५० हजार रुपैया हात पार्नेछन् । उपविजेताले १ लाख ७० हजार, तेश्रोले १ लाख र चौथो हुनेले ५० हजार रुपैया हात पार्नेछन् । प्रतियोगिताको सर्वाेत्कृष्ट खेलाडीले १० हजार रुपैया हात पार्नेछ । व्यक्तिगत विधातर्फका बेष्ट स्पाईकर, बेष्ट ब्लकर, बेष्ट सर्भर, बेष्ट सेटर, बेष्ट लिवेरो र वेष्ट प्रशिक्षकले जनही ५–५ हजार रुपैया हात पार्नेछन् ।

यस प्रतियोगिताको अघिल्लो संस्करण रोल्पामा भएको थियो । पहिलो संस्करणमा पुरुषतर्फ नेपाल पुलिस क्लब र महिलातर्फ नेपाल एपिएफ क्लब च्याम्पियन बनेको थियो । पुरुषतर्फको प्रतियोगिता भने इटहरीमा सम्पन्न भैसकेको छ । नेपाल पुलिस क्लबले फाइनलमा आर्मीलाई हराउँदै च्यामिपयन बन्न सफल भएको थियो ।