काठमाडौं (हाम्रो खेलकुद ) – दोस्रो संस्करणको न्यु डायमण्ड कप खुला राष्ट्रिय महिला भलिबल प्रतियोगितालाई होङवान्जी बौद्ध समाज नेपालको साथ पाएको छ ।

सुकेधारास्थित समाजका तर्फबाट नेपाल प्रमुख सोनाम वाङ्दी भुटिया र प्रतियोगिता संयोजक कुमार राईले मंगलवार सम्झौता पत्रमा हस्ताक्षर गर्दै आदन–प्रदान गरे । होङवान्जी बौद्ध समाजका भुटियाले हामी न्यु डायमण्डका समर्थक रहेको र न्यु डायमन्डसँग जोडिने अवसर पाएकोमा समाज गौरवान्वित भएको बताए ।

सम्झौता अनुसार होङवान्जीले आयोजकलाई ५ लाख उपलब्ध गराउने छ । सम्झौता पश्चात प्रतियोगिता ‘होङवान्जी न्यु डायमण्ड कप दोस्रो खुला राष्ट्रिय महिला भलिबल’ को नामले संचालन हुनेछ ।

प्रतियोगिता संयोजक कुमार राईले प्रतियोगिताको सम्पूर्ण तयारी पूरा भएको जानकारी दिदै होङवान्जी बौद्ध समाजलाई महत्वपूर्ण सहयोगका लागि धन्यवाद ब्यक्त गरे । यस्तै प्रतियोगितालाई नानी छोरी स्मृति प्रतिष्ठानका असोककुमार मालीले तेस्रो पुरस्कारको रकम १ लाख १ हजारको प्रायोजन तथा ब्ल्याकहर्ष सुजले चौथो पुरस्कार ५१ हजारको प्रायोजन गरेको आयोजकले बताएका छन् ।

हाल अमेरिका निवासी भलिबलका बरिष्ठ प्रशिक्षक हुकुमराज गिरी र भलिबल खेलाडी रमिला तण्डुकारबाट ५०-५० हजार सहयोग प्राप्त प्रतियोगिता संयोजक कुमार राईले बताए ।

नैकापस्थित न्युडायमण्ड एकेडेमीमा लिग कम नकआउटका आधारमा संचालन हुने प्रतियोगितामा सहभागी टिमलाई चार समूहमा विभाजन गरिएको छ । साविक बिजेता न्यु डायमण्ड र चितवन टाईगे्रस समूह ‘ए’ मा रहेका छन् भने समूह ‘बी’ मा टप्स र पारामाउन्ट छन् । त्यस्तै समूह ‘सी’ मा आर्मी र पुलिस तथा समूह ‘डी’ मा एपीएफ र जावलाखेल रहेका छन् ।

प्रतियोगिताको बिजेताले ३ लाख र उपविजेताले २ लाख रुपैयाँ पाँउने छन । तेस्रो हुने टिमले एक लाख एक हजार र चौथोले ५० हजार प्राप्त गर्ने छन् । प्रतियोगिताको सर्वोकृष्ट खेलाडीले १५ हजार रुपैयाँ र ब्यक्तिगत विधाका उत्कृष्टले जनही ५-५ हजार रुपैयाँ प्राप्त गर्नेछन् । प्रतियोगिताको उद्घाटन युवा तथा खेलकुद मन्त्री जगतवहादुर सुनार तथा समापन सभामुख कृष्णवहादुर महराले गर्ने छन् ।

उद्घाटन खेल आयोजक न्युडायमण्ड र चितवन टाईग्रैसबीच हुनेछ । प्रतियोगिता पुस २५ देखि २८ सम्म सञ्चालन हुनेछ ।