आर्मी र पुलिस फाइनलमा भिड्ने

काठमाडौं (हाम्रो खेलकुद) – दुई विभागीय टोली त्रिभुवन आर्मी क्लब र नेपाल पुलिस क्लब दोस्रो सभामुख कप पुरुष भलिबल प्रतियोगिताको उपाधिका लागि भिड्ने भएका छन् ।

इटहरि रंगशालास्थित भलिबल कोर्टमा आइतबार भएको सेमिफाइनलमा उपाधिको दावेदार आर्मीले गण्डकी प्रदेशलाई ३–० को सोझो सेटमा पराजित गर्दै फाइनलमा पुलिससँगको भेट पक्का गरेको हो ।

आर्मीले गण्डकीमाथि २५–२०, २५–११ र २५–२० को सहज जित निकाल्यो । आइतबारै भएको पहिलो सेमिफाइनलमा पुलिसले अर्काे विभागीय टोली नेपाल एपिएफ क्लबलाई ३–१ को सेटमा पराजित गर्दै फाइनलमा पुग्न सफल भएको थियो ।

पुलिसले सुरुवाती दुई सेट २५–१६ र २५–२१ ले सहजै आफ्नो पक्षमा पारेपनि तेस्रो सेट १७–२५ ले गुमाएको थियो । तर, चौथो सेट पुलिसले २५–२१ ले जित्न सफल भयो ।

फाइनल खेल सोमबार हुनेछ । खेल दिउसो १ बजेपछि हुनेछ । प्रतियोगितामा सात प्रदेश र तीन विभागीय टोली गरी १० टोलीको सहभागिता रहेको छ । प्रतियोगिताको विजेताले ४ लाख, रुपैया र उपविजेताले २ लाख रुपैयाँ प्राप्त गर्ने छन् । तेस्रो हुनेले १ लाख रुपैयाँ पाउनेछ ।