काठमाडौं (हाम्रो खेलकुद) – साविकको विजेता त्रिभुवन आर्मी क्लब पोखरामा जारी चौथो आरबीबी एनभिए राष्ट्रिय पुरुष क्लब लिग भलिबल च्याम्पियनसिपको शीर्षस्थानमा उक्लिएको छ ।

बिहिबारका लागि तय भएको खेलबाट आर्मीले हेल्प नेपालबाट वाकओभर पाएपछि आर्मी स्वतः ३ अंक प्राप्त गर्दै शीर्ष स्थानमा उक्लिएको हो । आर्मीको ६ खेलबाट १५ अंक पुगेको छ । समान खेलबाटै नेपाल एपिएफल क्लब १४ अंक जोडेर दोस्रो तथा नेपाल पुलिस क्लब १३ अंक जोडेर तेस्रो स्थानमा छ । रुपन्देहीको मणिमुकुन्द भलिबल क्लब ११ अंकका साथ चौथो र नयाँबजार स्पोर्टस् क्लब ९ अंकका साथ पाँचौ स्थानमा छ ।

काठमाडौंको हेल्प नेपाल स्पोर्टस् क्लबले बुधबार नै विवादका कारण एपिएफलाई वाकओभर दिएको थियो । नेपाल भलिबल संघका वरिष्ठ उपाध्यक्ष याम गुरुङले हेल्प नेपालले नियम विपरित ४ विदेशी खेलाडी खेलाउने लागेपछ एपिएफले प्रोटेस्ट हालेपछि खेल विवादित बनेको र बुधबार एपिएफ र बिहिबारको खेल नै बहिस्कार गरेको बताए । उनले पुरानै तीन विदेशी खेलाडीसहित मैदान उत्रन बारम्बार अनुरोध गर्दा पनि खेल्न नआएको जानकारी गराए ।

‘हेल्प नेपालले नेपाली भलिबलको बिकासमा काम गर्दै आइरहेको हामीलाई थाहा छ । तर, यो प्रतियोगतामा नियमविपरित बढी विदेशी खेलाउन लागेपछि नै खेलमा विवाद आएको हो,’ उपाध्यक्ष गुरुङले भने, ‘उनीहरुकै कारण पोखरामा दर्शकको सङ्ख्या बढेको थियो । तर, खेल नै बहिस्कार गरेर हिडेपछि हामीले आर्मी र जावलाखेललाई ३–३ अंक दिनुपर्यो ।’ उनले म्यानेजर्स मिटिङमा हेल्प नेपालका प्रतिनिधि नआउँदा पनि यस्तो अवस्था सिर्जना हुन पुगेको बताए ।

यता, हेल्प नेपालका महासचिव अरुणकुमार श्रेष्ठले केही गल्ती हाम्रो तर्फबाट भएपनि आयोजकले तत्कालै वाकओभर दिन लगाएपछि हामीले प्रतियोगिता नै बहिस्कार गर्नुपरेको बताए ।

पोखरा रंगशालास्थित भलिबल प्रशिक्षण केन्द्रमा हेल्प नेपालले बिहिबार आर्मी र जाउलाखेलसँग खेल्ने तालिका थियो । हेल्प नेपालले खेल नै बहिस्कार गरेपछि नियमानुसार आर्मी र जावलाखेलले समान ३–३ अंक प्राप्त गरे । बिहिबार भएको खेलमा ढोरपाटनले जाउलाखेललाई ३–१ सेटमा पाखा लगायो ।

ढोरपाटनले जाउलाखेलमाथि २५–१७, १८–२५, २५–१५ र २५–१८ को सेटमा पराजित गर्यो । नयाँबजारले ढोरपाटनलाई २५–२२, २५–१८, र २५–१८ को सोझो सेटमा हरायो । दुई विभागिय डर्बी भिडन्तमा नेपाल पुलिसले एपिएफलाई ३–१ को सेटमा पराजित गर्दै लिगमा एपिएफलाई पहिलो हार चखायो । पहिलो दुई सेट २५–१७ र २५–२१ ले जितेको पुलिसलाई तेश्रो सेट २४–२६ ले गुमाएको थियो । तर, चौथो सेट पुलिसले २५–१७ ले सहजै आफ्नो पक्षमा पार्न सफल भयो । यस्तै मणिमुकुन्दले जाउलाखेललाई २५–१४, २५–१२, र २५–२० को सेटमा हरायो ।