काठमाडौं (हाम्रो खेलकुद) – न्यु डायमन्ड कप कप खुला राष्ट्रिय महिला भलिबल प्रतियोगिताको दोस्रो संस्करण यही पुस अन्तिम साता हुने भएको छ ।

आयोजक न्यु डायमन्ड स्पोर्टस् क्लबले बिहिबार राजधानीमा पत्रकार सम्मेलनको आयोजना गर्दै प्रतियोगिता पुस २५ गतेबाट २८ गतेसम्म हुने जानकारी गराएको हो । प्रतियोगितामा ७ देखि ८ क्लबले सहभागिता जनाउने प्रतियोतिा संयोजक कुमार राईले पत्रकार सम्मेलनमा जानकारी गराए ।

न्यु डायमन्डले नेपालको राष्ट्रिय खेल भलिबलको बिकासमा सहयोग पुर्याउने उद्देश्यले एक दशकयता निरन्तर प्रशिक्षण गराइरहेको छ । प्रशिक्षण गराईराख्नु मात्र भलिबल बिकासमा पूर्णता नदेखिएको कारण खेलाडीहरुको क्षमता मापन गर्ने उद्देश्यले तथा नयाँ प्रतिभाहरू अझै जन्माउने उद्देश्यले गतवर्ष देखि प्रतियोगिता आयोजना गरेको संयोजक राईले बताए ।

प्रतियोगितामा सहभागी हुने काठमाडौंबाहिरको टिमलाई आयोजकले खाना र बस्नको लागि प्रबन्ध मिलाउनेछ । काठमाडौंको टिमलाई यातायात खर्च उपलब्ध गराइने आयोजकले जनाएको छ ।

प्रतियोगिताको विजेताले नगद ३ लाख १ हजार रुपैयाँसहित सिल्ड, मेडल र प्रमाणपत्र प्राप्त गर्नेछन् । उपविजेताले २ लाख १ हजार रुपैयाँसहित सिल्ड, मेडल र प्रमाणपत्र प्राप्त गर्नेछन् । तेस्रो हुनेले १ लाख १ हजारसहित सिल्ड, मेडल र प्रमाणपत्र प्राप्त गर्नेछन् । चौथो हुनेले ५१ हजार रुपैयाँसहित प्रमाणपत्र मात्र प्राप्त गर्नेछ ।

प्रतियोगिताको सर्वाेत्कृष्ट खेलाडीले १५ हजार रुपैया प्राप्त गर्नेछन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ५–५ हजार रुपैयाँसहित ट्रफी र प्रमाणपत्र प्राप्त गर्नेछन् । प्रतियोगिताको कुल बजेट करिव २३ लाख रुपैयाँरहेको छ ।

गतवर्ष आयोजक न्यु डायमन्डले नेपाल एपीएफ क्लबलाई पराजित गर्दै च्याम्पियन बनेको थियो । प्रतियोगिता नयाँ बसपार्कस्थित ढोरपाटन क्लबको खेल मैदानमा हुनेछ ।