काठमाडौं (हाम्रो खेलकुद) – आरबिबी एनभिए राष्ट्रिय पुरुष लिग भलिबल प्रतियोगिताको चौथो संस्करण अन्तर्गत बुधबार साविकको विजेता विभागीय त्रिभुवन आर्मी क्लबले दोहोरो जित निकाल्दा अर्काे विभागीय टोली नेपाल एपीएफ क्लबले हेल्प नेपालबाट वाकओभर पाएको छ ।

पोखरा रंगशालास्थित भलिबल कोर्टमा बुधबार भएको खेलमा आर्मीले मणिमुकुन्द भलिबल क्लब रुपन्देहीमाथि ३–२ को प्रतिस्पर्धात्मक सेटमा जित निकाल्दा पुलिसमाथि भने ३–० को सोझो सेटमा जित निकालेको थियो । पहिलो सेट १७–२५ ले गुमाएको आर्मीले दोस्रो सेट २६–२४ ले आफ्नो पक्षमा पार्दै खेलमा फर्कियो । तेस्रो सेट २४–२६ कै अवस्थामा गुमाएको आर्मी चौथो सेट २५–९ ले सहजै आफ्नो पक्षमा वार्दा निर्णायक सेट १५–२ ले जित्न सफल भयो ।

अर्काे खेलमा आर्मीले पुलिसमाथि २५–१९, २५–२१ र २५–१५ को सहज जित निकाल्यो । आर्मी ५ खेलबाट १२ अंक जोडेर दोश्रो स्थानमा छ । बुधबारै भएको खेलमा नेपाल एपिएफ क्लबले ढोरपाटन क्लबलाई ३–० को सोझो सेटमा पराजित गरेको थियो । एपीएफले ढोरपाटनलाई २५–१२, २५–२१ र २५–१५ ले पराजित गरेको थियो ।

दिनको दोस्रो खेलमा एपीएफले हेल्प नेपालबाट वाकओभर पायो । हेल्प नेपालले नियम विपरित ४ जना विदेशी खेलाडी खेलाएको भन्दै एपएिफले प्रोटेस्ट हालेको थियो । अन्ततः हेल्प नेपालले बाध्य भएर वाक ओभर दिनुपरेको थियो ।

यससँगै एपिएफले ३ अंक जोडेर लिगको शीर्ष स्थानमा उक्लन सफल भयो । एपीएफले ५ खेलबाट १४ अंक जोड्यो । बुधबार नै भएको अर्को खेलमा नयाँ बजार समाज क्लबले जाउलाखेल क्लबलाई २५–१९, २५–१७ र २५–२१ को सोझो सेटमा पराजित गर्यो ।