काठमाडौं (हाम्रो खेलकुद) – विभागीय नेपाल एपीएफ क्लब र हेल्प नेपाल स्पोर्टस् क्लबले पोखरामा जारी चौथो आरबीबी एनभिए पुरुष राष्ट्रिय क्लब लिग भलिबल च्याम्पियनसिपमा रोमाञ्चक जित निकालेका छन् । एपीएफले साविकको विजेता विभागीय टोली त्रिभुवन आर्मी क्लब र हेल्प नेपालले अर्काे विभागीय टोली नेपाल पुलिस क्लबमाथि ३–२ को रोमाञ्चक जित निकाले ।

पोखरा रंगशालाास्थित भलिबल प्रशिक्षण केन्द्रको कोर्टमा मंगलबार भएको खेलमा एपीएफएफले उपाधिको दावेदार आर्मीमाथि प्रतिस्पर्धात्मक जित दर्ता गर्यो । एपीएफले पहिलो सेटमा आर्मीमाथि २५–२१ को जित निकालेको थियो । दोस्रो सेट आर्मीले २५–१८ ले आफ्नो पक्षमा पारेपछि खेल १–१ सेटको बराबरीमा पुगेको थियो ।

तेस्रो सेट २५–२१ ले आफ्नो पक्षमा पार्दा एपिएफले खेलमा २–१ को सेटमा अघि बढेको थियो । आर्मीले पनि चौथो सेट २५–२० ले जितेपछि खेल २–२ को रोमाञ्चक मोडमा पुगेको थियो । तर, निर्णायक सेटमा एपिएफले आर्मीलाई १५–११ ले पराजित गर्दै खेल ३–२ ले आफ्नो पक्षमा पार्न सफल भयो । रोमाञ्चक जित निकालेको एपिएफको ८ अंक पुग्दा आर्मीको ७ अंक छ ।

मंगलबारै भएको अर्काे खेलमा हेल्प नेपालले विभागीय नेपाल पुलिस क्लबमाथि ३–२ को प्रतिस्पर्धात्मक जित निकाल्यो । हेल्प नेपालले दुई सेटमा पछि परेको स्थिति उल्ट्याएर जित निकालेको हो । हेल्प नेपालले पहिलो र दोस्रो सेट २१–२५ र २०–२५ ले गुमाएको थियो । तर, हेल्प नेपालले उत्कृष्ट पूनरागमन गर्दै तीनै सेटमा जित निकाल्यो ।

प्रतिस्पर्धात्मक बनेको तेस्रो सेट हेल्प नेपालले ३१–२९ ले आफ्नो पक्षमा पार्दै खेलमा फर्कने संकेत दिएका थियो । चौथो सेट २५–१९ ले सहजै आफ्नो पक्षमा पारेको हेल्प नेपालले निर्णायक सेट १५–८ ले जित्दै टिमलाई लिगमा तेस्रो जित निकाल्न सफल भयो । लिगमा पुलिसको ४ खेलबाट १० अंक छ । हेल्प नेपालको तीन खेलबाट ७ अंक पुगेको छ ।

अर्को खेलमा मणिमुकुन्द भलिबल क्लब रुपन्देहीले ढोरपाटन क्लबमाथि २५–२३, २५–२० र २५–१६ को सहज जित निकाल्यो ।
लिग अन्तर्गत बुधबार आर्मीले मणिमुकुन्द र पुलिससँग खेल्नेछ । एपिएफले ढोरपाटन र हेल्प नेपालसँग प्रतिस्पर्धा गर्दा जावलाखेल र नयाँ बजारबीच पनि बुधबार नै खेल हुने आयोजकले जनाएको छ ।