काठमाडौं (हाम्रो खेलकुद) – नेपाल नम्बर १ गल्फर शिवराम श्रेष्ठले सूर्य नेपाल काठमाडौं ओपनको उपाधि जित्दै करिअरको ४३ औं उपाधि हात पारेका छन् । उनले यसअघि भएको सूर्य नेपाल सेन्ट्रल ओपनको उपाधि पनि जितेका थिए ।

सूर्य नेपाल गल्फ टुरअन्तर्गत दोस्रो प्रतियोगितामा शिवरामले पहिलो दिन देखि अग्रता कायम गर्दै चिर परिचित प्रतिद्वन्द्वी भुवन नगरकोटीलाई ६ स्ट्रोकले पराजित गरे । उनले अन्तिम दिन इभन पार ६८ को स्कोर जोड्दै समग्रमा ११ अन्डर २ सय ६१ स्कोरसहित उपाधि जिते । दोस्रो स्थानका भुवनले अन्तिम दिन ५ अन्डर ६३ को उत्कृष्ट प्रदर्शन गर्दै समग्रमा ५ अन्डर २ सय ६७ स्कोर बनाए । शिवरामले उपाधिसहित ९५ हजार रुपैयाँ हात पारे । भुवनले ६५ हजारमा चित्त बुझाए ।

तेस्रो स्थान हासिल गरेका धनबहादुर थापाले ४ अन्डर २ सय ६८ को प्रदर्शन गर्दै ५५ हजार रुपैया प्राप्त गरे । चौथो स्थानका विकाश अधिकारीले ३ अन्डर २ सय ६९ स्कोर जोड्दै ४४ हजार पाए । रामे मगर पाँचौ हुँदै ३८ हजार रुपैयाँ बुझ्दा छैटौं स्थानका जयराम श्रेष्ठले ३२ हजार प्राप्त गरे । सातौं स्थानका राजेन्द्र थापा मगरले २८ हजार बुझे । संयुक्त आठौँ स्थानका दिपक थापा मगर र भुवन कुमार रोक्काले जनही २३ हजार तथा दशौँ स्थानका सूर्य प्रसाद शर्माले १८ हजार पाए ।

एमेच्योरतर्फ शुक्रबहादुर राईले अन्तिम दिन १ ओभर ६९ खेल्दै ४ अन्डर २ सय ६८ को उत्कृष्ट स्कोर जोड्दै उपाधि जिते । टंकबहादुर कार्की १ ओभर २ सय ७३ स्कोरसहित उपविजेता बने । उनले अन्तिम दिन ४ ओभर ७२ को खराब प्रदर्शन गरे ।

व्यवसायिक तर्फ शीर्ष २१ खेलाडीले नगद पुरस्कार प्राप्त गरे । सूर्य नेपालका सेल्स एण्ड मार्केटिङका उपाध्यक्ष दिप्रा लाहिरी, नेपाल व्यवसायिक गल्फर संघका अध्यक्ष राजेन्द्रमान श्रेष्ठ र नेपाल गल्फ संघका अध्यक्ष टासी घलेले पुरस्कार वितरण गरेका थिए । प्रतियोगितामा ३३ व्यवसायीक र ८ एमेच्योरसहित कुल ४१ गल्फरको सहभागिता थियो ।