काठमाडौं — कन्टिनेन्टल ट्रेडिङको आयोजनामा आउँदो शनिबार गोकर्ण गल्फ रिसोर्टमा इसुजु ओपन गल्फ प्रतियोगिताको आयोजना हुने भएको छ ।

मंसिर ८ मा हुने एकदिने प्रतियोगितामा करिब १ सय खेलाडीले प्रतिस्पर्धा गर्ने गल्फ क्लबका निर्देशक दीपक आचार्यले बताए । ३/४ स्टेबल फोर्ड फर्म्याटमा खेलिने प्रतियोगितामा नेट विजेता र उपविजेतासँगै ग्रस विजेताले ट्रफी पाउनेछन् । दुवै विजेताले ६० हजार बराबरको गिफ्ट ह्याम्पर पनि प्राप्त गर्नेछन् । विधागततर्फ महिला, सिनियर (६० वर्षमाथि) र जुनियर (१७ वर्षमुनि) का विजेतालाई पनि ट्रफी र गिफ्ट ह्याम्पर प्रदान गरिनेछ ।

प्रतियोगिताको मुख्य आकर्षणको रुपमा होल इन वनमा दुई गाडी पुरस्कार राखिएको छ । विगतमा एमेच्योर प्रतियोगितामा एउटा होलमा पुरस्कार राखिएकोमा यसपटक भने गोकर्ण गल्फ कोर्षको दुई होलमा दुई गाडी पुरस्कार राखिएका छन् । पार ३ को होल नम्बर १० र होल नम्बर १६ मा ‘होल इन वन’ गर्नेले झन्डै ४० लाख रुपैयाँ पर्ने इसुजुको पिकअप पुरस्कार पाउनेछन् । प्रतियोगितामा लङगेस्ट ड्राइभ, क्लोजेस्ट टु द पिन र मस्ट बर्डिज विजेतालाई पुरस्कृत गरिनेछ ।

नेपालमा इसुजु गाडीको अधिकृत विक्रेताको रुपमा स्थापित कन्टिनेन्टल ट्रेडिङ प्रालि सन् २००९ मा स्थापित भएको कम्पनि हो । संस्थाका अध्यक्ष सुहृद घिमिरेले नेपालको गल्फ विकासमा सहयोग पुर्याउने हिसाबले प्रतियोगिता आयोजना गरेको बताए । यसबाहेक इसुजुका पिकअप गल्फ खेलाडीलाई उपयुक्त हुने कारणले यस क्षेत्रमा इसुजुको दयारा बढाउन पनि उनले गल्फ प्रतियोगिता आयोजना गरेको बताए ।

‘इसुजु पिकअप चढेर तपाईं तारे होटलको पार्टी देखि एडभेन्चर गर्न सम्म सक्नुहुनेछ । विशेषगरि गल्फका खेलाडीलाई हाम्रो प्रोडक्टले आकर्षण गर्ने सम्भावना देखेका छौं,’ उनले भने । घिमिरेले निकट भविष्यमा व्यवसायिक गल्फमा पनि संस्थाले दयारा बढाउने बताए ।