अर्जुन कार्की

बाग्लुङ – बागलुङ जिल्लाको गल्कोट नगरपालिका जारी २२ औं संस्करणको राष्ट्रिय महिला भलिबलको उपाधिको लागि विभागीय टिम एपीएफ र नेपाल पुलिस भिड्ने भएका छन् ।

शुक्रबार भएको सेमिफाईन खेलमा एपीएफले प्रदेश नम्बर ५ लाई र नेपाल पुलिसले त्रिभुवन आर्मीलाई पराजित गर्दै फाईनल प्रवेश गरेका हुन । पहिलो सेमिफाईनल खेलमा साविकको विजेता एपीएफले प्रदेश नम्बर ५ लाई ३–० को सोझो सेटमा पराजित गरेको थियो । महिल भलिबलमा यस वर्ष ५ औं उपाधि जित्ने लक्ष्यमा रहेको एपीएफले प्रदेश नम्बर ५ लाई २५–१९, २५–१५ र २५–१६ ले पराजित गरेको थियो ।

यस्तै दोस्रो सेमिफाइनल खेलमा पुलिसले आर्मीलाई ३–० को सोझो सेटमा पाखा लगाउँदै फाइनलमा प्रवेश गरेको हो । पहिलो सेटमा संघर्षपूर्ण जित निकालेको पुलिसले दोस्रो र तेस्रो सेट सजिलै जितेको थियो । पुलिसले आर्मीलाई २८–२६, २५–१५ र २५–१४ को सेटमा पराजित गरेको थियो ।

प्रतियोगिताको उपाधिको लागि शनिबार दुई विभागीय टिम सशस्त्र प्रहरी बलको एपीएफ क्बल र नेपाल प्रहरीको पुलिस क्लब विच प्रतिस्पर्धा हुनेछ भने त्यस अगाडी तेस्रो स्थानको लागि त्रिभुवन आर्मीले प्रदेश नम्बर ५ को सामाना गर्ने जिल्ला भलिबल संघ बागलुङका सचिव सन्दिप पन्तले जानकारी दिए ।

नेपाल भलिबल संघको आयोजना, जिल्ला भलिबल संघ बागलुङको व्यवस्थापन संचालन भईरहेको प्रतियोगिताबाट राष्ट्रिय टोलीका १८ खेलाडी र ६ बैकल्पिक लागि २४ खेलाडीको छनोट गरिने नेपाल भलिबल संघका वरिष्ठ उपाध्यक्ष याम गुरुङले बताए ।

प्रतियोगिताको विजेताले ५०, दोस्रोले ३० र तेस्रोले २० हजार पाउने छन् । प्रतियोगिताको सर्वोत्कृष्ट खेलाडीले १० हजार रुपैयाँ पाउनेछन् । त्यस्तै उत्कृष्ट स्पाइकर, सर्भर, लिबेरो, सेटर र ब्लकरलाई समान ५ हजार रुपैयाँ पाउनेछन् ।