काठमाडौं (हाम्रो खेलकुद) – नेपाल नम्बर १ व्यवसायिक गल्फर  शिवराम श्रेष्ठले सूर्य नेपाल गल्फ टुर २०१८/१९ अन्तर्गत सिजनको पहिलो प्रतियोगिता सूर्य नेपाल सेन्ट्रल ओपनको उपाधि जितेका छन् । प्रतियोगिताको अन्तिम दिन बिहिबार उनले दोस्रो स्थानका भुवन नगरकोटीलाई १२ स्ट्रोकको फराकिलो अन्तरले पराजित गर्दै करिअरको ४२ औं उपाधि हात पारेका हुन् ।

बिहीबार गोकर्ण गल्फ कोर्समा शिवरामले ३ अन्डर ६९ को स्कोर जोड्दै समग्रमा १५ अन्डर २ सय ७३ स्कोरसहित विजेता बने । उनले १ लाख २० हजार रुपैयाँ प्राप्त गरे । घरेलु कोर्सका भुवन नगरकोटी १ अन्डर ७१ खेल्दै समग्रमा ३ अन्डर २ सय ८५ सहित उपविजेतास्वरुप ७७ हजार रुपैयाँ हात पारे ।

तेस्रो स्थानमा एमेच्योर टासी छिरिङ रहे । उनले अन्तिम दिन ४ ओभर ७६ सहित कुल ४ ओभर २ सय ९२ स्कोरसहित एमेच्योरतर्फ उपाधि जिते । धनबहादुर थापाले अन्तिम दिन ३ ओभर ७५ जोडेपछि कुल ५ ओभर २ सय ९३ सहित व्यवसायीकतर्फ तेस्रो स्थानका साथ ५५ हजार रुपैयाँ हात पारे । वाङचेन धोन्दुपले ३ ओभर ७५ खेल्दै समग्रमा ८ ओभर २ सय ९६ स्कोरसहित एमेच्योर उपविजेता बने ।

शिवरामले फ्रन्ट नाइनमा ५ अन्डर ३१ र ब्याक नाइनमा २ ओभर ३८ खेले । उनले पहिलो, तेस्रो, पाँचौ, सातौं र नवौं होलमा बर्डी लेखाए । १२ औं र १५ औं होलमा भने उनले बोगी खेपे । भुवनले भने फ्रन्ट नाइनमा २ अन्डर ३४ र ब्याक नाइनमा १ ओभर ३७ को स्कोर लेखाए ।

अन्य नगद पुरस्कार :

रामकृष्ण श्रेष्ठ – ४३ हजार

दिपक मगर – ३५ हजार

कृष्णमान राजवाहक, रामे मगर, विकास अधिकारी – प्रति खेलाडी ३०,३३३ हजार

रवी खड्का – २६ हजार

शिवकुमार माझि – २५ हजार

प्रतियोगितामा ३० व्यवसायिक र ११ एमेच्योरगरि कुल ४१ गल्फरहरुले प्रतिस्पर्धा गरेका थिए । तेस्रो दिनदेखि २१ व्यवसायिक र ८ एमेच्योर गल्फरले कट बनाए । प्रतियोगितामा विजेताले १ लाख २० हजार रुपैयाँ प्राप्त गरे । उपविजेताले ७७ हजार, तेस्रो स्थान हासिल गर्नेले ५५ हजार तथा २१ औं स्थान सम्मका व्यावसायिक गल्फरले नगद पुरस्कार पाए । यस प्रतियोगिताको कुल पुरस्कार राशी ६ लाख ६१ हजार ५ सय रुपैयाँ रहेको थियो ।