काठमाडौं (हाम्रो खेलकुद) – नेपाल नम्बर १ शिवराम श्रेष्ठले सूर्य नेपाल गल्फ टुर अन्तर्गत सूर्य नेपाल सेन्ट्रल ओपनको दोस्रो दिन पनि लय कायम राख्दै अग्रता बढाएका छन् ।

गोकर्ण गल्फ कोर्समा दोस्रो दिन ५ अन्डर ६७ स्कोर जोड्दै समग्रमा ९ अन्डर स्कोरका साथ ७ स्ट्रोकको अग्रता बनाएका छन् । दोस्रो दिन ५ अन्डर ६७ स्कोर जोडेका एमेच्योर खेलाडी टासी छिरिङ र ४ अन्डर ६८ को स्कोर बनाएका भुवन नगरकोटी समग्रमा २ अन्डर १४२ अंक सहित संयुक्त रूपमा दोस्रो स्थानमा छन् ।

शिवरामले फ्रन्ट नाइनमा ४ अन्डर ३२ र ब्याक नाइनमा १ अन्डर ३५ मा खेले ‌। भुवनले अघिल्लो दिनको प्रदर्शन सुधार्दै फ्रन्ट नाइनमा ५ अन्डर ३१ र ब्याक नाइन १ ओभर ३७ को स्कोर बनाए। एमेच्योर खेलाडी टासी छिरिङले फ्रन्ट नाइन ४ अन्डर ३२ र ब्याक नाइन १ अन्डर ३५ मा पुरा गरे ।

अघिल्लो दिन दोस्रो रहेका धन थापा समग्रमा १ अन्डर १४३ को स्कोरमा चौथो, एमेच्योर खेलाडी वाङ्चेन धन्डुप १ ओभर १४५ का साथ पाँचौ र २ ओभर १४६ सहित सूर्यप्रसाद शर्मा छैटौं स्थानमा छन।

दोस्रो दिनको समाप्तीमा १४ ओभर १५८ स्कोर बनाउने २२ प्रोफेसनल ९ एमेच्योर खेलाडीले कट बनाएका छन। कुल ६ लाख ६१ हजार ५ सय पुरस्कार राशीको प्रतियोगिताको विजेताले विजेताले १ लाख २० हजार रुपैयाँ प्राप्त गर्नेछ।