काठमाडौं (हाम्रो खेलकुद) – नेपाल नम्बर १ शिवराम श्रेष्ठले सूर्य नेपाल गल्फ टुर २०१८/१९ अन्तर्गत पहिलो प्रतियोगिता सूर्य नेपाल सेन्ट्रल ओपनमा सुखद सुरुआत गरेका छन् ।

पहिलो दिनको खेलमा प्रतियोगिताको साविक विजेता समेत रहेका शिवरामले ४ अन्डर ६८ स्कोर जोड्दै अग्रता लिएका छन् । फ्रन्ट नाइनमा ५ अन्डर ३१ को उत्कृष्ट प्रदर्शन गरेका शिवरामले ब्याक नाइनमा १ ओभर ३७ खेलेपनि २ स्ट्रोकको अग्रता बनाउन सफल भएका छन् । दोस्रो स्थानमा आर्मी क्लबका धनबहादुर थापा छन् । उनले २ अन्डर ७० खेलेका छन् । एमेच्योर गल्फर पृथ्वी मल्लले पनि २ अन्डर ७० स्कोर जोडे ।

शिवरामले सुरुआती तीनै होलमा बर्डी प्रहार गर्दै उत्कृष्ट सुरुआत गरेका थिए । उनले त्यसपछि पाँचौ र आठौँ होलमा पनि बर्डी लेखाउँदै फ्रन्ट नाइनमा शानदार सुरुआत पाए । टर ब्याक नाइनको १२ औं होलमा डबल बोगी खेपेपछि उनी केहि दबाबमा परे । त्यसपछि १३ औं र १५ औं होलमा बर्डी लेखाएपनि अन्तिम गोलमा बोगी खेप्दै उनले ब्याक नाइनमा १ ओभर ३७ स्कोर जोडे ।

दोस्रो स्थानका धनबहादुरले फ्रन्ट नाइनमा इभन पार ३६ खेलेपनि ब्याक नाइनमा २ अन्डर ३४ खेल्दै राम राम्रो पुनरागमन गरे । एमेच्योर पृथ्वीले फ्रन्ट नाइनमा २ अन्डर ३४ र ब्याक नाइनमा इभन पार ३६ को स्कोर जोडे । कृष्णमान राजवाहक इभन पार ७२ सहित चौथो स्थानमा छन् । दिपक मगर र एमेच्योर द्वय सुनील केसी र सन्दीप तामाङ समान १ ओभर ७३ सहित संयुक्त पाँचौमा छन् ।

उपाधि दावेदार मानिएका घरेलु क्लबका खेलाडी भुवन नगरकोटीका लागि भने पहिलो दिन बिर्सनलायक रहयो । उनले २ ओभर ७४ स्कोर जोड्दै संयुक्त आठौँ स्थानमा रहे । तेस्रो होलमा नै डबल बोगी खेप्दै खराब सुरुआत लिएका उनले फ्रन्ट नाइनमा २ ओभर ३८ र ब्याक नाइनमा इभन पार ३६ स्कोर बनाए । उनी शिवरामभन्दा ६ स्ट्रोकले पछाडी परेका छन् । भुवनसँगै दीपक आचार्य, विकास अधिकारी, प्रदिप लामा तथा एमेच्योर द्वय वाङचेन धोन्दुप र सुरेन्द्र फुयाल पनि २ ओभर ७४ मा छन्  ।

प्रतियोगितामा ३० व्यवसायिक र ११ एमेच्योरगरि कुल ४१ गल्फरहरुले प्रतिस्पर्धा गर्दैछन् । प्रतियोगितामा विजेताले १ लाख २० हजार रुपैयाँ प्राप्त गर्नेछन् । उपविजेताले ७७ हजार, तेस्रो स्थान हासिल गर्नेले ५५ हजार तथा २१ औं स्थान सम्मका व्यावसायिक गल्फरले नगद पुरस्कार पाउनेछन् । यस प्रतियोगिताको कुल पुरस्कार राशी ६ लाख ६१ हजार ५ सय रुपैयाँ छ ।