काठमाडौं (हाम्रो खेलकुद) – घरेलु महिला भलिबलको सबैभन्दा सफल टोली विभागीय नेपाल एपीएफ क्लब राजधानीमा जारी आदी अवादी महिला भलिबल लिग (एभीएल) को फाइनलमा प्रवेश गरेको छ ।

लिग अन्तर्गत मंगलबार भएको प्रतिस्पर्धातमक खेलमा एपीएफ चिरपरिचित प्रतिद्धन्द्धी न्यु डायमन्ड एकेडेमीलाई ३–० को सोझो सेटमा पराजित गर्दै उपाधि नजिक पुगेको हो । एपीएफले अब उपाधिको लागि चितवन टाइग्रेससँग बुधबार प्रतिस्पर्धा गर्नेछ । तीन अमेरिकी खेलाडी र पोखरामा अधिकांश खलोडी समेटेर तयार भएको चितवनले विभागीय नेपाल पुलिस क्लबमाथि ३–० को सहज जित निकाल्दै फाइनलमा प्रवेश गरेको थियो ।

त्रिपुरेश्वरस्थित राष्ट्रिय खेलकुद परिषदको कर्भडहलमा मंगलबार भएको दोस्रो सेमिफाइनलमा डायमन्डले शुरुवाती अग्रता जोगाउन नसक्दा २२–२५ ले पहिलो सेट गुमाएको थियो । दोस्रो सेटमा पनि डायमन्ड सेट प्वाइन्टमा पुगेर चुक्दा २४–२६ ले खेल गुमाएपछि डायमन्ड २–० ले पछि परेको थियो । तेस्रो सेटमा एपिएफसामु निरिह देखिएपनि डायमन्डले उत्कृष्ट पूनरागमन गर्दै खेललाई रोमाञ्चक बनाएको थियो । तर, डायमन्ड खेलमा फर्कन निकै ढिला भैसेकेको थियो । एक समय ९–१८ रहेको स्थितिमा डायमन्डले उच्च प्रदर्शनलाई खेललाई २३–२४ को स्थितिमा ल्याएपनि हार टार्न नसक्दा २३–२५ ले सेट गुमायो ।

न्युडायमन्डको यो वर्ष एपिएफसँग यो पाँचौं हार हो । तीन प्रतियेगितामा फाइनलमा पराजित भएको डायमन्डले दुई खेल भने मैत्रीपूर्ण खेलमा गुमाएको थियो । डायमन्डले गत वर्ष माघमा भएको डायमन्ड कपको फाइनलमा पराजित गरेयता एपिएफलाई पराजित गर्न सकेको छैन ।

सर्वाधिक पुरस्कार राखीको एभिएल बिजेताले ६ लाख नगद प्राप्त गर्ने छ । त्यस्तै उपबिजेताले ३ लाख र तेस्रो हुनेले १ लाख ५० हजार प्राप्त गर्नेछन् । प्रतियोगिताको उत्कृष्ट खेलाडीले एक थान स्कुटर र नगद ५० हजार प्राप्त गर्नेछन् ।