काठमाडौं (हाम्रो खेलकुद) – उपाधिको प्रवल दावेदार न्यु डायमन्ड एकेडेमीलाई पराजित गर्दै चितवन टाइग्रेस राजधानीमा जारी आदीअवादी महिला भलिबल (एभीएल) लिगको समूह ‘ए’ को विजेताको रुपमा सेमिफाइनलमा प्रवेश गरेको छ ।

त्रिपुरेश्वस्थित राष्ट्रिय खेलकुद परिषदको कभर्डहलमा सोमबार भएको लिगको अन्तिम खेलमा तीन अमेरिकी खेलाडी सम्मिलित चितवन टाइग्रेसले डायमन्डमाथि ३–१ को जित निकाल्दै समूह विजेताको रुपमा अन्तिम चारमा पुग्न सफल भएको हो । चितवनसँग पराजित भएपनि डायमन्डले समूह उपविजेताको रुपमा अन्तिम चारमा पुग्न सफल भयो । चितवनले शतप्रतिशत जितसहित ६ अंक जोडेर शीर्ष स्थानमा रहँदा डायमन्ड २ अंक जोडेर दोस्रो स्थानमा रह्यो । १ अंक जोडेको आर्मी पुछारमा रहँदै प्रतियोगिताबाट बाहिरियो ।

चितवन टाइग्रेसले पहिलो सेटमा २५–१९ को सहज जित निकालेको थियो । प्रतिस्पर्धात्मक बनेको दोस्रो सेटमा डायमन्डले २९–२७ को कठिन जत निकाल्दै खेलमा फर्कने संकेत देखाएका थिए । दोस्रो सेटमा १०–१५ को स्थितिमा चितवनले उत्कृष्ट पुनरागमन गरेपनि डायमन्डले आफ्नो अग्रतालाई जोगाउदै जित निकाल्न सफल भएको थियो । तेस्रो सेटमा चितवनले खेलमा पछि परेर पनि २५–१९ को सहज जित निकाल्दै २–१ को अग्रता बनाएको थियो । १७–१९ को स्थितिमा चितवनले लगातार अंक जोड्दै डायमन्डलाई १९ अंकमै रोक्न सफल भएको थियो । प्रतिस्पर्धात्मक बनेको चौथो सेटमा पनि चितवनले २८–२६ को संघर्षपूर्ण जित निकाल्दै डायमन्डमाथि ३–१ को सेटमा जित निकाल्न सफल भयो ।

भलिबलको इतिहासमा सर्वाधिक पुरस्कार राखीको एभिएल बिजेताले ६ लाख नगद प्राप्त गर्ने छ । त्यस्तै उपबिजेताले ३ लाख र तेश्रो हुनेले १ लाख ५० हजार प्राप्त गर्ने छन् । प्रतियोगिताको उत्कृष्ट खेलाडीले एक थान स्कुटर र नगद ५० हजार प्राप्त गर्ने छन् ।

न्यु डायमन्ड र एपीएफ सेमिफाइनलमा भिड्ने

घरेलु महिला भलिबलको दुई सफल र चिरपरिचित प्रतिद्धन्द्धी नेपाल एपीएफ क्लब र न्यु डायमन्ड एकेडेमीबीच आदीअवादी महिला भलिबल (एभीएल) लिगको सेमिफाइनलमा खेल्ने भएको छ ।

लिग अन्र्तगत सोमबार समूह चरणको खेलपछि एपीएफले सेमिफाइनलमा डायमन्डसँगको भेट पक्का गरेका हुन् । समूह ‘ए’ बाट डायमन्ड उपविजेताको रुपमा अघि बढेको थियो । उपाधिको प्रवल दावेदार एपीएफले समूह चरणको अन्तिम खेलमा पोखरा पिङ्केजलाई २५-१३, २५-११, २५-१५ को सोझो सेटमा पराजित गर्दै डायमन्डसँगको भेट पक्का गरेको हो ।

सेमिफाइनल खेल मंगलबार हुनेछ । घरेलु महिला भलिबलका हरेक प्रतियोगिताहरुमा यि दुई टोलीले मात्रै फाइनल खेल्दै आएका थिए । अर्काे सेमिफाइनलमा नेपाल पुलिस क्लब र चितवन टाइग्रेसबीच मंगलबार नै खेल हुनेछ ।