काठमाडौं (हाम्रो खेलकुद) – विभागीय टोली नेपाल एपीएफ क्लब र आयोजक ढोरपाटन क्लब राजधानीमा जारी पाँचौ ढोरपाटन एम–१५० राष्ट्रिय खुला पुरुष भलिबल प्रतियोगिताको सेमिफाइनलमा प्रवेश गरेका छन् । एपीएफले मन्डली स्पोर्टस् क्लब पाल्पालाई ३–० को सेटमा पराजित गर्दै अन्तिम चारमा पुग्न सफल भएको हो ।

नयाँ बसपार्कस्थित ढोरपाटन क्लबको खेल मैदानमा बिहिबार भएको खेलमा एपीएफले पहिलो सेट २५–२० ले आफ्नो पक्षमा पारेको थियो । दोस्रो र तेस्रो सेट २५–१५ र २५–१६ ले आफ्नो पक्षमा पार्न सफल भयो । बिहिबारै भएको प्रतिस्पर्धात्मक खेलमा आयोजक ढोरपाटनले थ्री स्टार एकेडेमीमाथि ३–२ को प्रतिस्पर्धात्मक सेटमा जित निकाल्दै अन्तिम चारमा पुग्न सफल भयो । पहिलो सेट २५–२२ ले जितेको ढोरपाटनले दोस्रो सेट ३२–३० ले आफ्नो पक्षमा पारेको थियो । त्यसपछि लगातार दुई सेट गुमाएको ढोरपाटनले अन्तिम सेट आफ्नो पक्षमा पार्दै सेमिफाइनलमा स्थान सुरक्षित गरेको हो । थ्री स्टारले तेस्रो र चौथो सेट २५–१८ र २५–१५ ले जितेपछि अन्तिम सेटको नतिजा कुर्नुपरेको थियो । तर अन्तिममा ढोरपाटन १५–१३ ले विजयी हुन सफल भयो ।

यस्तै गिताञ्जली कलेजले बुढानिलकण्ठलाई ३–० कै सेटमा पराजित ग¥यो । पहिलो सेट २८–२६ ले जितेको गिताञ्जलीले दोस्रो र तेस्रो सेट २५–१४ र २५–२३ ले आफ्नो पक्षमा पारेको थियो । गन्डकी प्रदेश र बडिगार्ड गाउपालिकाबीचको अन्तिम क्वाटरफाइनल खेल आजै हुने भनिएपनि हुन सकेन । उक्त खेल भोलि हुनेछ ।
सेमिफाइनलमा गीतान्जली कलेजले एपीएफको सामना गर्नेछ ।

यति ब्रुअरी प्रालिको उत्पादन इनर्जी ड्रिंङ्स एम–१५० ले मुख्य प्रायोजन गरेको प्रतियोगिताको विजेताले १ लाख रुपैया प्राप्त गर्नेछ । दोस्रो हुनेले ६० हजार र तेस्रो हुने टिमलाई ५० हजार प्राप्त गर्ने आयोजकले जनाएको छ । प्रतियोगिताको उत्कृष्ट खेलाडीले एक थान मोटरसाइकल पाउनेछन् । ब्यक्तिगत विधा अन्तर्गत स्पाईकर, ब्लकर क्वीक डिफेन्डर, सर्भर लिफ्टर र प्रशिक्षकलाई ५ हजार प्रदान गरिने छ । प्रतियोगितामा एक जना दर्शकलाई स्कुटर, ८ जना दर्शकले इजी टिसर्ट र अरु ८ जना दर्शकले डाइमण्ड मोबाइल पाउनेछन् ।