पोखरा (हाम्रो खेलकुद) – डिफेन्डिङ च्याम्पियन नेपाल एपीएफ क्लब र चितवन टाईगर राष्ट्रिय महिला भलिवल प्रतियोगिताको सेमिफाइनलमा प्रवेश गरेका छन् ।

पोखराको लामाचौरमा तीज महोत्सवका अवसरमा सोमवार भएको लिग खेलमा एपीएपले चितवन टाइगरलाई ३–० को सोझो सेटमा हराउदै अन्तिम चारमा स्थान बनाएको हो । एपीएफले चितवन टाइगरमाथि २५–१९, २५–१८ र २५–१४ को सहज जित निकाल्यो । पराजय पश्चात पनि चितवन टाईगरले उपबिजेताको रुपमा सेमिफाईनलमा स्थान बनायो ।

सोमबारै लामाचौरस्थित इन्द्रराज्य लक्ष्मी माविको खेल मैदानमा भएको उद्घाटन खेलमा न्यू डायमण्ड एकेडेमीले पोखराको टप्स माविलाई ३–० को सोझो सेटमा पराजित ग¥यो । न्यु डायमन्डले टप्समाथि २५–२२, २५–१७ र २५–१९ को सोझो सेटमा जित निकाल्यो । दोस्रो खेलमा न्यु डायमण्डले आर्मीबिरुद्धको खेलमा २५–१७, २५–१७ र १६–६ को अग्रता लिइरहेको अवस्थामा भारी वर्षा भएपछि खेल स्थगित भएको छ ।

भदौं २७ गतेसम्म संचालन हुने उक्त प्रतियोगिताको उद्घाटन गण्डकी प्रदेशका सामाजिक विकास मन्त्री नरदेवि पुनले गरिन् । प्रतियोगितामा विजेता टिमल १ लाख र उपबिजेताले ६५ हजार सहित ट्रफि मेडल प्रमाणपत्र प्राप्त गर्ने भएको संयोजक सुशिल श्रेष्ठले जनाए ।

सात टिमको सहभागिता रहने भनिएको प्रतियोगितामा समूह ‘ए’ मा रहेका नेपाल पुलिस र जाउखाखेल भलिवल प्रशिक्षण केन्द्रको सहभागिता छैन् । महोत्सव अन्तर्गत प्रदेश स्तरिय छात्रा भलिबलको उपाधि टप्स माविले जितेको छ । सोमबार भएको फाइनल खेलमा टप्सले करुणा निधि फाउण्डेसन (केफ) लाई सोझो सेटमा पराजित गर्दैै उपाधि जितेको हो । विजेताले २५ हजार र उपविजेताले १५ हजार पुरस्कार प्राप्त गरे