जाकार्ता (हाम्रो खेलकुद) – नेपाललाई इन्डोनेसियामा आज सम्पन्न हुने १८ औं एसियाली खेलकुदमा नेपाललाई पदक विहिन हुनबाट जोगाउने प्याराग्लाइडिङ पुरुष टोली आज स्वदेश फर्कदैछ । विमल अधिकारी, युकेश गुरुङ, विजय गौतम, सुशील गुरुङ र विशाल थापा रहेको टोलीले पुरुष क्रस कन्ट्रीमा रजत पदक जितेको थियो ।

सबै खेलाडीले टाक्स पुरा गर्दै नेपाललाई दोस्रो पटक रजत पदकको उपलब्धी दिलाएका थिए । समूहगत खेलमा नेपालले जितेको त्यो पहिलो पदक हो । यसअघि नेपालले सबै पदक व्यक्तिगत प्रतिस्पर्धामा जितेको थियो । नेपालले यसअघि जितेका २३ मध्ये तेक्वान्दोले १ रजतसहित १३ कास्य तथा बक्सिङ र करातेले समान ३ कास्य पदक जितेका थिए ।

सन् १९९८ मा सविता राजभण्डारीले तेक्वान्दोमा रजत पदक जितेकी थिइन् । यस पटक नेपालले २९ खेलमा १ सय ८५ खेलाडीलाई उतारेको थियो । तर, सबै खेलले निराश बनाउँदा पहिलो पटक समावेश प्यराग्लाइडिङले नेपाललाई पदक विहिन हुनबाट जोगाएको थियो । नेपाल स्वर्ण विजेता जापानभन्दा २७ अंकले मात्रै पछि प¥यो ।

पाँचौ राउन्डको खेल सकिदा नेपालले ११ हजार ३ सय ६४ जोडेको छ । पहिलो स्थानमा रहेको जापानले ११ हजार ३ सय ९१ अंक जोड्यो । यसअघिका दुई सस्करणमा पनि नेपालले एक एक कास्य पदकमा सन्तोष गर्नु परेको थियो । २०१० को ग्वान्जाउ एसियाडमा बक्सिङका दीपक महर्जन र २०१४ को इन्चोन एसियाडमा करातेकी विमला तामाङले कास्य पदक जितेकी थिइन् ।