जाकार्ता (हाम्रो खेलकुद) – इन्डोनेसियामा जारी १८औं एसियाली खेलकुद अन्तर्गत पुरुष भलिबलको वरीयता खेलमा नेपाल श्रीलंकासँग पराजित भएको छ । नेपाल श्रीलंकासँग ३–१ को सेटमा पराजितभएको हो । 

नेपाली भलिबल टाली । फाइल तस्बिर

एसियाडको नियमअनुसार सहभागी २० टोलीको वरीयता निर्धारणका लागि पराजित टिमहरुबीच पुन खेल खेलाउने गर्दछ । नेपालले १३औं देखि १८औं वरीयताको खेलमा मंगोलियामाथि ३–१ को जित निकाल्दै १३ देखि १६औं वरीयतामा रहेको थियो । मंगोलियामाथिको जित एसियाड भलिबलमा नेपालको पहिलो जित हो । यसअघि नेपालले एसियाडमा जित निकाल्न सकेको थिएन ।

गोर बुलुनगन स्टेडियममा बिहिबार भएको खेलमा नेपाल श्रीलंकासँग ३–१ को सेटमा पराजित भएको हो । प्रतिस्पर्धात्मक बनेको खेलमा नेपालले पहिलो सेट २५–२३ ले जित्न सफल भएको थियो । तर, त्यसपछिको तीन सेट नेपालले १६–२५, २४–२६ र २१–२५ ले गुमाउन पुग्यो ।

दोस्रो सेटमा श्रीलंकासामु निरिह देखिएपनि नेपालले तेस्रो सेटमा एक समय चार अंकले पछि परेपति उत्कृष्ट खेल पस्केको थियो । २४–२४ को बराबरीको अवस्थामा खेल रहँदा नरेन्द्र गिरी र मानबहादुर श्रेष्ठले गल्ती गरेपछि नेपालले तेस्रो सेट गुमाउन पुगेको थियो । चौथो सेटमान शुरुबाटै अग्रता लिएपनि नेपालले त्यो अग्रतालाई जोगाउन सकेन ।

अब नेपालले १५औं र १६औं वरीयताको लागि भियतनाम वा किर्गिस्तानबीचको पराजित टिमसँग शुक्रबार खेल्नेछ ।