काठमाडौं (हाम्रो खेलकुद) – नेपाल एथलेटिक्स संघको आज हुनुपर्ने निर्वाचन सरेको छ । नेपाल एथलेटिक्स संघले मंगलबार राजधानीमा पत्रकार सम्मेलनको आयोजना गर्दै इन्डोनेसियामा हुने एसियन गेम्सका कारण संघको केन्द्रिय कार्यसमितिको साधरण सभा र निर्वाचन सार्नुपरेको जानकारी गरायो ।

संघको गत जेठ २३ गतेको कार्यसमिति बैठकले साउन २९ गते चितवनको सौराहामा चुनावी साधरण सभा गर्ने तयारी गरेको थियो । आज हुने निर्वाचन सरेपछि संघको निर्वाचनको मिति भदौ २२ गतेलाई तोकिएको छ । ‘हामी जुनुसुकै बेला पनि निर्वाचन गर्न तयार छौं । तर, राष्ट्रिय खेलकुद परिषदबाट जाकार्ता र पालेमबाङ एसियाडका कारण र संघको निर्वाचनका लागि केही प्रक्रिया मिलाउनुपर्ने पत्र आएपछि हामी निर्वाचन सार्न बाध्य भयौं, ‘नेपाल एथलेटिक्स संघका अध्यक्ष राजीवविक्रम शाहले पत्रकार सम्मेलनमा भने, ‘एथलेटिक्स संघ जुनसुकै बेला पनि निर्वाचन गर्न तयार छ । राखेपले पठाएको चार तोक आदेशको जवाफ हामीले पठाइसकेका छौं । अब निर्वाचन रोकिनुपर्ने कुनै कारण छैन ।’

संघले बुधबारै एसियाड टोलीलाई बिदाई बिदाई गरेको छ । नेपाली एथलेटिक्स टोली २२ अगस्टमा इन्डोनेसिया प्रस्थान गर्नेछ । नेपाली टोलीले एक महिनाअघिबाट भारतको कोलकत्तामा विशेष प्रशिक्षण गरेको थियो । नेपाली टोली सोमबार साँझ नेपाल आइपुगेको थियो । नेपाली खेलाडीहरुमा यामसाजन सुनार, गोपीचन्द्र पार्की, कृष्ण बस्नेत, सोम बहादुर कुमाल, सरस्वती भट्टराई र विश्वरुपा बुढा छन् । यामले १०० र २०० मिटर दौडमा प्रतिस्पर्धा गर्नेछ । सोमबहादुर कुमालले ४०० र ८०० मिटरमा प्रतिस्पर्धा गर्नेछ । यस्तै गोपीचन्द्र पार्की र कृष्ण बस्नेतले म्याराथनमा, सरस्वती भट्टराईले ८०० र १५ सय मिटर र विश्वरुपा बुढाले ५ हजार र १० हजार मिटर दौडमा प्रतिस्पर्धा गर्नेछन् । एथलेटिक्सका खेलहरु २५ अगस्टबाट हुनेछ ।