गुवाहटी, माघ २७
भारतको गुवाहटी र सिलोङमा जारी १२औं दक्षिण एसियाली खेलकुद (साग) प्रतियोगितामा नेपालले छैठौं दिन आज ६ रजत पदक जितेको छ । सिलोङमा बुधबार भएको उसुको थाउलोतर्फ २ रजत र सान्सुतर्फ ४ रजत गरी नेपालले ६ रजत पदक जितेको हो ।

नेपालका लागि हरिप्रसाद गोले, सविता राई, विन्दु पुन मगर र राजेश चौधरी, झरना गुरुङ र जुनी राईले रजत पदक जितेका हुन् । हरिप्रसाद गोलेले उसुको थाउलो स्पर्धामा पहिलो चरणमा ९.०१ र दोस्रो चरणमा पनि समान अंक प्राप्त गर्दै कुल १८.०२ अंकका साथ रजत पदक जितेका हुन् । उसुको महिला थाउलो अन्तर्गत ताइचिक्वान स्पर्धामा सविता राईले रजत जितेकी छिन् । उनले पहिलो चरणमा ९.१५ अंक र दोस्रो चरणमा आज ८.५५ गरेर कुल १७.७० अंक प्राप्त गर्दै रजत जितेकी हुन् । उसुको पुरुष सान्सुतर्फ ५६ केजी तौल समूहमा नेपालका राजेश चौधरीले रजत पदक दिलाए । स्वर्ण पदकका लागि आज भएको प्रतिस्पर्धामा भारतीय खेलाडी रवि पञ्चलसँग २–० ले पराजित भएपछि राजेशले रजतमै चित्त बुझाउनु परेको हो ।

त्यस्तै, आजै भएको उसुतर्फको महिला सान्सु ७० केजी तौल समूहमा नेपालकी विन्दु पुन मगरले रजत पदक जितेकी हुन् । स्वर्ण पदकका लागि भएको प्रतिस्पर्धामा भारतकी पूजा काडियासंग २–० ले पराजित हुदै विन्दुले रजत पदक जितेकी हुन् । उसुको महिला सान्सुतर्फ नेपालकी झरना गुरुङले पनि रजत पदक जितेकी छिन् । ५२ केजी तौल समूहमा प्रतिस्पर्धा गरेकी झरना भारतीय खेलाडी युमनाम सनाथोइसंग२–० ले पराजित हुदै रजत पदकमा सिमित बनेकी हुन् । त्यस्तै, उसुकै सान्सुतर्फ महिला स्पर्धाको ६० केजी तौल समूहमा नेपालकी जुनी राइले पनि रजत पदक मै चित्त बुझाएकी छिन् ।
छैठौ दिनसम्म नेपालको पदक संख्या २९ पुगेको छ । नेपालले हालसम्म एक स्वर्ण, ११ रजत र १७ कास्य पदक जितेको छ ।