काठमाडौं (हाम्रो खेलकुद) – चौथो केएनपी राष्ट्रिय महिला भलिबल प्रतियोगिता अन्तर्गत समूह ‘बी’ को अन्तिम खेलमा शिवम् न्यु डायमण्ड एकेडेमीले त्रिभुवन आर्मी क्लबलाई ३-२ ले पराजित गर्दै सेमिफाइनलमा स्थान पक्का गर्यो। आर्मी भने समूहमा अन्तिम हुँदै प्रतियोगिताबाट बाहिरिएको छ। 

तस्बिर: विवेक सुवेदी/हाम्रो खेलकुद

त्रिपुरेश्वर स्थित राष्ट्रिय खेलकुद परिषद्को कभर्डहलमा सम्पन्न खेलमा आर्मीलाई डायमण्डले ३-२ ले पराजित गर्यो। पहिलो सेट २५-१९ ले आफ्नो पक्षमा पारेको डायमण्डले दोस्रो सेट २५-१९ ले गुमाएको थियो।

तेस्रो सेट २५-१८ ले डायमण्डले जितेको थियो भने २५-२२ ले चौथो सेट आर्मीले जितेपछि पाँचौ सेट निर्णायक भएको थियो। पाँचौ सेटमा १५-१० को जित निकाल्दै डायमण्डले सेमिफाइनलमा स्थान पक्का गर्यो। आफ्नो पहिलो खेलमा दुवै टोली नेपाल पुलिस क्लबसँग ३-१ ले पराजित भएपछि यो खेल निर्णायक रह्यो।

आजनै समूह ए को अन्तिम खेलमा जावलाखेल भलिबल प्रशिक्षण केन्द्र र पश्चिमाञ्चल भलिबल टोली भिड्ने छन्। यस खेलको विजेताले पनि सेमिफाइनलमा स्थान बनाउने छ। अहिलेसम्म नेपाल पुलिस क्लब, नेपाल एपिएफ र शिवम् न्यु डायमण्ड एकेडेमीले अन्तिम ४ मा स्थान बनाएका छन्। भोलीको पहिलो सेमिफाइनलमा न्यु डायमण्ड एकेडेमीले एपिएफको सामना गर्नेछ। दोस्रो सेमिफाइनलमा पुलिस क्लब र आजको दोस्रो खेलको विजेता प्रतिस्पर्धा गर्नेछन्।