काठमाडौं (हाम्रो खेलकुद) – त्रिपुरेश्वर स्थित राष्ट्रिय खेलकुद परिषद्को कभर्डहलमा जारी चौथो केएनपी राष्ट्रिय महिला भलिबल प्रतियोगितामा दुई टोली सेमिफाइनल पुगिसकेका छन् । सेमिफाइनलमा पुगन बाँकी दुई स्थानका लागि आज चार टोली प्रतिस्पर्धामा छन् । आइतबार हुने खेलबाट बाँकी दुई टोलीको टुंगो लाग्ने छ।

नेपाल एपिएफ क्लब समूह ‘ए’ को विजेताको रुपमा सेमिफाइनलमा पुगिसकेको छ । पहिलो दिन जावलाखेल भलिबल प्रशिक्षण केन्द्रलाई र शनिबार दोस्रो दिन पश्चिमाञ्चल भलिबल टोलीलाई ३–० ले हराउँदै एपिएफ अन्तिम चारमा पुगेको थियो ।

पहिलो खेलमा शिवम् न्यु डायमण्ड एकेडेमीलाई हराएको समूह ‘बी’ को विजेता नेपाल पुलिस क्लबले शनिबार त्रिभुवन आर्मीलाई ३–१ ले पराजित गर्दै सेमिफाइनलमा स्थान सुरक्षित गरेको थियो ।

आज हुने समूह चरणको दुई खेलमा, दुवै खेलको विजेताले सेमिफाइनलमा स्थान बनाउने छ भने पराजित टोली प्रतियोगिताबाट बाहिरिने छ । पहिलो खेलमा ११ बजे शिवम् न्यु डायमण्ड एकेडेमीले आर्मीको सामना गर्दैछ। त्यस्तै १ः३० बजे जावलाखेल भलिबल प्रशिक्षण केन्द्रलाई र पश्चिमाञ्चल भलिबल टोली भिड्ने छन् ।

तीन विभागीय टोलीसहित न्यु डायमण्ड एकेडेमी, पश्चिमाञ्चल भलिबल टोली र जावलाखेल भलिबल प्रशिक्षण केन्द्रको सहभागिता रहेको प्रतियोगिताको फाइनल बैशाख २५ गते हुनेछ । प्रतियोगितामा उत्कृष्ट प्रदर्शन गर्ने खेलाडीलाई ‘केएनपी सर्वोकृष्ट खेलाडी’ को उपाधि सहित १० हजार रुपैयाँ प्रदान गरिनेछ ।