सेन्ट्रल जोन भलिबलः नेपाल घरेलु टोली बंगलादेशसँग पराजित

काठमाडौं- चौथो संस्करणको एभीसी सेन्ट्रल जोन सिनियर मेन्स भलिबल च्याम्पियनसिपको पहिलो खेलमा नेपाल घरेलु टोली बंगलादेशसँग पराजित भएको छ ।

तस्बिर: मोहम्मद साइफुल इस्लाम सरकार

बंगबन्धुस्थित कवर्डहलमा शनिबार भएको उद्घाटन खेलमा नेपाल घरेलु टोली बंगलादेशसँग ३–१ को सेटमा पराजित भएको हो । पहिलो सेटमा २६–२४ को कठिन जित निकालेको नेपालले त्यसपछिको तीनै सेट सहजै गुमायो । दोस्रो सेट १८–२५, तेस्रो सेट १४–२५ र चौथो सेट २१–२५ ले गुमायो ।

स्वर्ण जित्ने लक्ष्यसहित ढाका पुगेको नेपाली टोलीले पहिलो खेलमा हार बेहोरेपनि नेपालको सेमिफाइनल पुग्ने सम्भावना जीवितै छ । नेपालले आइतबार माल्दिभ्सलाई पराजित गरे नेपालको सेमिफाइल यात्रा जीवितै रहने छ । पराजित भएको खण्डमा नेपाल च्याम्पियनसिपको समूह चरणबाटै बाहिरिनेछ ।

मध्य एसियाका दोस्रो स्तरका टोलीहरुका लागि प्रत्येक बर्ष आयोजना हुदै आएको सेन्ट्रल जोन प्रतियोगिता नेपालका लागि निक्कै महत्वपुर्ण प्रतियोगिता हो । सेन्ट्रल जोन प्रतियोगिताको चौथो संस्करण आयोजना भईरहदा नेपालले पनि चौथो पटक सहभागीता जनाएको हो । यही प्रतियोगितामा नेपालले गतवर्ष कास्य जित्दै ४२ वर्षे भलिबल इतिहासमा ऐतिहासिक पदक हात पारेको थियो