काठमाडौं (हाम्रो खेलकुद)– तेस्रो संस्करणको प्रधान सेनापति राष्ट्रिय पुरुष भलिबल प्रतियोगिताको उपाधि आयोजक त्रिभुवन आर्मी क्लबले जितेको छ । फाइनल खेलमा आर्मीले पश्चिमाञ्चललाई हराउन सफल भएको हो ।

फाइनल खेलमा पश्चिमाञ्चललाई २५-१४,२५-१३,२३-२५,२५-१३ ले हराउँदै आर्मीले तेस्रो पटक लगातार उपाधि उचालेको छ । यस जितसँगै आर्मीले ३ लाख रुपैया नगद पुरस्कार प्राप्त गरेको छ । उपविजेता पश्चिमाञ्चलले १ लाख ५० हजार हात पार्न सफल रह्यो ।

त्यस्तै तेस्रो स्थानको लागि खेलिएको खेलमा नेपाल पुलिस क्लबले नेपाल एपीएफलाई २५-२१,२५-२०,२५-११ को सोझो सेटमा पराजित गर्‍यो । तेस्रो स्थान हात पार्दै पुलिसले ७५ हजार नगद पुरस्कार पनि प्राप्त गर्‍यो ।

फागुन ६ गतेबाट शुरु भएको प्रतियोगितामा साविकको पाँच विकास क्षेत्र र तीन विभागीय टोली गरी ८ टिमले लिगकम नकआउटको आधारमा प्रतिस्पर्धा गरेका थिए ।

त्रिभुवन आर्मी क्लबका ईश्वर थापाले म्यान अफ दि सिरिज जित्दै एक थान एनएस २०० पल्सर बाइक हात पारे।  त्यस्तै अन्य विधामा उत्कृष्ट खेलाडीहरुले  जनही १० हजार प्राप्त गरे:

उत्कृष्ट स्पाइकरः मान बहादुर श्रेष्ठ (त्रिभुवन आर्मी क्लब)

उत्कृष्ट लिफ्टरः इम रानामगर (नेपाल पुलिस क्लब)

उत्कृष्ट ब्लकरः भैरव बम (त्रिभुवन आर्मी क्लब)

उत्कृष्ट सर्भरः अमृत केसी (पश्चिमाञ्चल विकास क्षेत्र)

उत्कृष्ट डिफेन्सः दीपक थापा (पश्चिमाञ्चल विकास क्षेत्र)

उत्कृष्ट प्रशिक्षकः कपिल किशोर श्रेष्ठ (त्रिभुवन आर्मी क्लब)