नेपालगन्ज (हाम्रो खेलकुद) – नेपालगन्जमा जारी पाँचौ प्रधानमन्त्री कप अन्तराष्ट्रिय महिला भलिबल प्रतियोगिताको सेमिफाइनल समिकरण पूरा भएको छ ।

शनिवार खेलमा विभागीय नेपाल एपीएफ क्लबले आयोजक न्यु इन्द्रेणी बागेश्वरी युथ क्लबलाई ३–० को सोझो सेटमा पराजित गदै समूह ‘ए’ को विजेता बन्दै अन्तिम चारमा पुग्न सफल भयो ।

वुमन अफ दि म्याच सरस्वती चौधरीको उत्कृष्ट प्रदर्शनमा एपीएफले आयोजक न्यु इन्द्रेणी बागेश्वरी युथ क्लबमाथि २५–१२, २५–१४ र २५–९ को सहज जित निकाल्यो । आयोजक लिग चरणको पहिलो खेलमा पनि बंगलादेशको इफाटसँग पराजित भएको थियो । समूह ‘ए’ बाट एक खेलमा सफलता निकालेको बंगलादेशी टिमले सेमिफाइनलमा स्थान बनायो ।

नेपालगन्ज कभर्ड हलमा भएको अन्तिम लिग खेलमा शिवम् न्यु डायमण्डले भारतको देहरादुन स्पोर्टस् क्लबलाई ३–० को सोझो सेटमा हराउदै समूह विजेताको रुपमा सेमिफाईनलमा स्थान पक्का गर्‍यो । कप्तान ललिता नाथको उत्कृष्ट प्रदर्शनमा देहरादुन स्पोर्टस् क्लबलाई २५–८, २५–९ र २५–४ को सेटमा पाखा लगायो ।

पहिलो खेलमा पनि नेपाल पुलिससँग ३–० को हार ब्यहोरेको पाहुना टिम देहरादुन स्पोर्टस् प्रतियोगिताबाट बाहिरिदा पुलिसले उपविजेताको रुपमा सेमिफाईनलमा स्थान बनायो । आइतबार सेमिफाइनलको पहिलो खेलमा एपीएफ र पुलिस तथा शिवम् न्यु डायमण्ड र पहुना टिम इफाटबीच प्रतिस्पर्धा हुनेछ ।