काठमाडौं (हाम्रो खेलकुद) – नेपाल पुलिस क्लबका प्रशिक्षक रुपेश विष्टले ढोरपाटन भलिबलमा पुलिस क्लबलाई हराउने षड्यनत्र भएको आरोप लगाएका छन् ।

प्रतियोगिता अन्तर्गत शुक्रबार आर्मीविरुद्धको अन्तिम खेलमा लाइट प्रोटेष्टको कारण देखाउदै रेफ्रीले खेल खेलाउन नमानेपछि प्रशिक्षक विष्टले यस्तो आरोप लगाएका हुन् । खेलमा पुलिसले २–१ को अग्रता बनाएको थियो भने, चौथो सेटमा पनि पुलिसले १६–६ को अग्रता लिएको अवस्थामा रेफ्रीले लाइट प्रोटेष्टको कारण देखाउदै खेल स्थगित गरेका थिए ।

‘हामी जितकै नजिक थियौ । रेफ्रीले पुलिसलाई हराउने षड्यन्त्रका साथ लाइट प्रोटेष्टको कारण देखाएर खेल खेलाएनन् ।’ प्रशिक्षक विष्टले भने, ‘हामीले बारम्वर खेलाउनको लागि अनुरोध गर्‍यौं तर, रेफ्रीले खेलाउन मान्नुभएन । जबकी त्यहाँ दर्शकहरुले देख्दा रेफ्रीले नदेख्ने भन्ने पनि हुन्छ ? यो सिधै पुलिसलाई हराउने षड्यन्त्र भएको हो ।’

प्रशिक्षक विष्टले स्थगित भएको खेल नखेल्ने समेत बताएका छन् । ‘हामी विभागीय टोली हौं । हामी अनुशासनमा बस्नुपर्छ । तर, हामी आर्मीसँग फेरि खेल्ने छैनौं ।’ प्रशिक्षक विष्टले भने, ‘शनिबारको लागि हामीलाई एक खेलको मात्र तालिका छ । एक दिनमा दुई महत्वपूर्ण म्याच हामी खेल्न सक्दैनौं । यसमा आयोजकले के गर्छ भन्ने मात्र हो ।’

डबल लिग भलिबलमा पुलिस १५ खेलबाट ३३ अंक जोडेर तेस्रो स्थानमा रहेको छ । आर्मी भने, २७ अंकसहित पाँचौ स्थानमा छ ।