काठमाडौं (हाम्रो खेलकुद) – उपाधि होडमा रहेका प्रतिद्धन्दी एपीएफ र शिवम् न्यु डायमण्ड एकेडेमीले १३ औं ‘रेडबुल ढोरपाटन युएम महिला डबल लिग भलिबल’ प्रतियोगितामा दोहोरो जित निकालेका छन् ।

बिहिवार विभागीय टिम एपीएफले दुवै खेलमा आर्मीलाई ३–० को सोझो सेटमा पराजित गर्दै दोहोरो जित निकालेका हुन् । प्रतियोगितामा एपीएफ र आर्मीबीचको पहिलो चरणको खेलमा खेल बर्षाको कारण स्थगित भएको थियो । एपीएफले आर्मीलाई २५–१२, २५–२० र २५–१९ को सेटमा हरायो । दोस्रो चरणको लिगको खेलमा पनि एपीएफले आर्मीलाई २५–१४, २५–१७ र २५–१८ को स्कोरमा पराजित गर्न सफल भयो ।

बिहीबार भएको खेलमा न्यु डायमण्डले चितवनको मेघौली र पोखराको उच्च माविलाई पराजित गर्दै दोहोरो जित निकाल्न सफल भयो । नयाँ बसपार्कस्थित ढोरपाटन क्लबको खेल मैदानमा भएको खेलमा न्यू डायमण्डले मेघौलीलाई २५–२२, २५–२२ र २५–२० को सोझो सेटमा पराजित गर्न सफल भयो । दोस्रो खेलमा टप्स उच्च माविलाई पनि न्यु डायमण्डले सोझो सेटमा नै पराजित गर्न सफल भयो । न्यु डायमण्डले २५–२०, २५–२३ र २५–८ को सेटमा टप्सलाई पराजित गरेको हो ।

प्रतियोगिताअन्तर्गत बिहीबार नै भएको अर्को खेलमा पुलिसले मेघौलीलाई सोझो सेटमा पराजित गरेको छ । पुलिसले मेघौलीलाई २५–११, २५–८ र २५–१६ को स्कोरमा पराजित गर्न सफल भयो । प्रतियोगितामा १६ खेलबाट ४६ अंकसहित न्यु डायमण्ड शीर्ष स्थानमा रहेको छ । १४ खेल खेल्दै शतप्रतिशत जितको साथ ४१ अंक बनाउदै एपीएफ लिगको दोस्रो स्थानमा रहेको छ ।

त्यस्तै, लिगको तेस्रो स्थानमा भने टप्स उच्च मावि रहेको छ । टप्सको १४ खेलबाट ३३ अंक जोडेको छ । लिगको चौथो स्थानमा रहेको पुलिसको ३० अंक छ । १५ खेलबाट २७ अंकसहित आर्मी पाँचौ स्थानमा रहँदा आर्मी श्रीगाँउ २१ अंकसहत छैटौ र १३ अंकसहित मेघैली सातौ स्थानमा छ ।

प्रतियोगिता अन्तर्गत शुक्रबार पाँच खेल हुने ढोरपाटन क्लबका अध्यक्ष मनवीर छन्त्यालले जानकारी दिए । पहिलो खेलमा एपीएफ र श्रीगाँउ,
आर्मी र मेघौली, पुलिस र श्रीगाँउ, एपीएफ र टप्स तथा पुलिस र आर्मीबीच खेल हुनेछ । माघ ४ गतेबाट शुरु भएको प्रतियोगिता माघ २० सम्म चल्नेछ ।