काठमाडौं (हाम्रो खेलकुद) –  नेपाली भलिबल टोलीले हङकङमा आज दोस्रो मैत्रीपूर्ण खेल खेल्दै छ । ३४ बर्षपछि भलिबलमा हङकङसँग प्रतिस्पर्धा गरेको नेपालले हिजोको पहिलो खेलमा हङकङलाई ३–२ को सेटमा पराजित गरेको थियो ।

हङकङलाई २३–२५, २८–२६, २५–२१, २१–२५, १७–१५ को सेटमा हराएको नेपाली टोलीले आजको खेलमा सुधारिएको खेल खेल्ने अपेक्षा गरिएको छ । आइतबारको जितमा पछिल्लो सेटहरुमा नेपाली टोली बलियो देखिएको थियो ।

हिजो खेलपछि नेपालका मुख्य प्रशिक्षक वीरेन्द्रप्रसाद चौधरीले सुरुमा खेलाडी केहि अलमलिए जस्तो देखेपनि पछि लयमा फर्केको बताएका थिए ।‘ घरेलु टोली पनि राम्रो हो । हामीले विश्वास गरेका केही खेलाडीले सोचे जस्तो खेल्न साकेनन्, उनले भने, खासमा मानबहादुरले सोचे जस्तो खेल्न सकेनन्, उनले राम्रो खेलेको भए हामी सिधा ३ सेटमा जित्न सक्थेऊ ।’

नेपालका कप्तान इम रानामगर हङकङको खेल बुझ्न समय लागेकाले नेपाली टोलीको तालमेल नमिलेको बताएका थिए । त्यसैले पनि आजको दोस्रो खेलमा नेपाली टोलीले अझ राम्रो खेल्ने अपेक्षा गर्न सकिन्छ ।

नेपाली राष्ट्रिय भलिबल टोलीले शनिबार हङकङ नेपलिज टिमलाई ३-१ ले हराएको थियो । हङकङपछि नेपाली टोलीले मकाउसँग मैत्रीपूर्ण खेल खेल्नेछ ।