काठमाडौं (हाम्रो खेलकुद) – प्रथम प्रधान सेनापति अन्तरविद्यालय छात्रा तेक्वान्दो प्रतियोगिता आजबाट सुरु भएको छ ।

नेपालमै पहिलोपटक विद्यालयस्तरमा अध्ययनरत छात्राहरुका लागि विभिन्न तौल समूहमा आयोजना गरिएको पहिलो प्रतियोगिता राजधानीको स्वयम्भुस्थित विजेश्वरी ज्ञान मन्दिर सैनिक महाविद्यालयमा शनिबारबाट शुरु भएको हो । प्रतियोगितामा १९ विद्यालयका १ सय ५० खेलाडीको सहभागिता रहेको छ ।

जुनियर र सिनियर गरी जम्मा १३ वटा तौल समुहमा फाईटिङ तथा एकल पुम्से र ग्रुप पुम्से गरी जम्मा २ समूहमा पुम्सेको प्रतिस्पर्धा गराईने छ । प्रतियोगिता सञ्चालनका निमित्त नेपाल तेक्वान्दो संघबाट १४ जनाको महिला नै जुरी तथा रेफ्रीहरु खटिएका छन् ।

सैनिक श्रीमती संघका अध्यक्ष रीता क्षत्रीले पानसमा बत्ति बाली प्रतियोगिताको उद्घाटन गरिन् । प्रतियोगिता माघ १५ गतेसम्म सञ्चालन हुनेछ ।
प्रतियोगितामा १७ स्वर्ण, १७ वटा रजत र ३४ वटा काश्य पदक प्रदान गरिने छ ।

आ–आफ्नो डोजाङका खेलाडीले प्राप्त गरेको पदक तालिकाको आधारमा प्रथम, द्वितीय र तृतीय हुने टीमलाई ट्रफी प्रदान गरिने छ । प्रतियोगिताका जुनीयर र सिनियर तौल समूहका उत्कृष्ट खेलाडीलाई उत्कृष्ट खेलाडीको ट्रफी, पदक र प्रमाण पत्र प्रदान गरिने छ ।