काठमाडौं (हाम्रो खेलकुद) – नेपाल भलिबल संघ र हङकङ भलिबल संघबीच शुक्रबार भएको औपचारिक भेटमा दुई देशको प्रशिक्षकबीच अनुभव आदानप्रदान कार्यक्रम गर्ने मौखिक सहमति भएको छ।

नेपाल भलिबल संघका अध्यक्ष मनोरन्जनरमण शर्माको नेतृत्वमा रहेको नेपाली टोली र हङकङ भलिबल संघका विकास निर्देशकबीच शुक्रबार भएको औपचारिक भेटघटमा २ देशको प्रशिक्षकबीच अनुभव आदानप्रदान कार्यक्रम गर्ने सहमति भएको हो । नेपाल भलिबल संघका महासचिव जितेन्द्र चन्दले हाललाई मौखिक सहमति भएको र छिट्टै सम्झौता पत्रमा हस्ताक्षर हुने बताए ।

नेपाली भलिबल टोलीका प्रशिक्षक जगादिश भट्टले प्राविधिक रुपमा भलिबलले विश्वमा धेरै फड्को मारी सकेकाले प्रविधिमा आब्बल हङकङसँगको यो कार्यक्रमले नेपाली भलिबललाई पनि बलियो बनाउन महत्वपूर्ण हुने बताए । उनले थपे, ‘भलिबल विकासका लागि यो अति महत्वपूर्ण सम्झैता हो र लक्ष्य प्राप्त भए खेलडी जन्माउन कोशेढुङा सावित हुनेछ।’

हङकङ निवास नेपाल भलिबलका इष्ट एसिया सदभावना दुत निरन्जन गुरुङ र सल्लाहकार जयनारायण चौधरीको समन्वयमा यहाँको राष्ट्रिय टोलीसँग मैत्रीपूर्ण खेलका लागि नेपाली राष्ट्रिय टोली बिहीबार हङकङ आएको छ । शुक्रबार नै पर्वत क्लब, हङकङले राष्ट्रिय भलिबल टोलीलाई सम्मान कार्यक्रमको आयोजना गरेको थियो ।

हङकङ एन आर एनले पनि नेपाली टोलीलाई स्वागत गर्दै विजयको शुभकामना दिएको थियो । हङकङ एन आर एनका अध्यक्ष टिका गुरुङले फेब्रुअरी १९ मा हङकङ महिला फुटबल टोली र सशस्त्र प्रहरी बल एपिएफबीच मैत्रिपूर्ण खेल हुने जानकारी दिए । नेपालले आईतबार र सोमबार हङकङविरुद्ध मैत्रीपूर्ण खेल खेल्दैछ । लगत्तै मकाउसँग बुधवार मैत्रिपूर्ण खेल खेल्नेछ ।