काठमाडौं (हाम्रो खेलकुद) – शिवम् न्यु डायमण्ड एकेडेमी र विभागीय नेपाल एपीएफ क्लबले राजधानीमा जारी १३ औं संस्करणको ‘रेडबुल ढोरपाटन युएम महिला डबल लिग भलिबल’ प्रतियोगितामा आफ्नो अपराजित यात्रा जारी राखेका छन् ।

प्रतियोगिताको आठौं दिन सकिदा शीर्ष स्थानमा रहेको शिवम् न्यु डायमण्डले पारामाउन्ट हाई स्कुललाई २५–३, २५–२ र २५–७ को सोझो सेटमा पराजित गर्दा एपीएफले श्रीगाँउ दाङलाई २५–११, २५–११ र २५–९ को सोझो सेटमा पराजित गर्दै लिगमा अपराजित रहन सफल भयो ।
अपराजित रहेको न्यु डायमण्ड ८ खेलबाट २४ अंकसहित शीर्ष स्थानमा रहँदा एक खेल कम खेलेको एपीएफ २१ अंकसहित दोस्रो स्थानमा यथावत छ ।

नयाँ बसपार्कस्थित ढोरपाटन भलिबल क्लबको खेल मैदानमा बिहिबार भएको प्रतिस्पर्धात्मक खेलमा विभागीय नेपाल पुलिस क्लबले टप्स उच्च माविलाई ३–१ को सेटमा पराजित गर्‍यो । पुलिसले टप्समाथि पहिलो सेटमा २५–१६ को जित निकालेको थियो । दोस्रो सेट भने टप्सले २५–१६ ले आफ्नो पक्षमा पार्दै खेललाई १–१ को बराबरीमा ल्याएका थिए ।

प्रतिस्पर्धात्मक बनेको तेस्रो सेट भने पुलिसले २६–२४ ले तथा चौथो सेट २५–२२ ले आफ्नो पक्षमा पारेको थियो । प्रतियोगितामा टप्सको यो पहिलो हार हो । जितपछि पुलिस ७ खेलबाट १५ अंकसहित तेस्रो स्थानमा रहेको छ । टप्स भने ६ खेलबाट १५ अंकसहित चौथो स्थानमा उक्लिएको छ । ७ खेलबाट आर्मी १५ अंकसहित पाचौं स्थानमा रहेको छ ।

बिहिबार त्रिभुवन आर्मी क्लबले थ्री स्टार एकेडमीलाई २५–६, २५–५ र २५–५ को सोझो सेटमा हरायो । मेघौली स्पोर्टस् क्लबले पूर्वाञ्चलमाथि १७–२५, २५–१७, २५–१४, २१–२५ र १५–१३ को रोमाञ्चक जित निकाल्यो । अर्काे खेलमा टप्सले न्यु डायमण्ड स्पोर्टस् क्लबमाथि २५–८, २५–१२ र २५–६ को सहज जित निकाल्यो ।

प्रतियोगिता अन्तर्गत शुक्रबार पनि ६ खेल हुने आयोजकले जनाएको छ । पहिलो खेलमा पुलिसले पूर्वाञ्चल, स्प्रिङडेलले मेघौली, पुलिसले थ्री स्टार एकेडेमी, श्रीगाँउ दाङले त्रिभुवन आर्मी, एपीएफले पूर्वाञ्चल र शिवम् नयु डायमण्डले टप्ससँग प्रतिस्पर्धा गर्नेछन् ।