काठमाडौं (हाम्रो खेलकुद) – नेपाली पुरुष तथा महिला बक्सिङ टोलीले भारतको नयाँ दिल्लीमा हुने प्रथम इन्डिया ओपन बक्सिङ च्याम्पियनसिपमा सहभागिता जनाउने भएको छ ।

नेपाल बक्सिङ संघले बिहिबार राजधानीमा पत्रकार सम्मेलन गर्दै ६ महिला खेलाडी र ६ पुरुष खेलाडीलाई बिदाई गरेको छ । खेलाडीहरुलाई राखेपका सदस्यसचिव केशव कुमार विष्टले बिदाई गरे । टोली बिहिबार दिल्ली प्रस्थान गर्नेछ ।

प्रतियोगिता जनवरी २६ बाट फ्रेब्रुवरी २ सम्म हुनेछ । प्रतियोगितामा महिलातर्फ ललिता महर्जन (४८ केजी), माला राई (५१ केजी), विमला श्रेष्ठ (५४ केजी), संगिता सुनार (६० केजी), पुनम रावल (६४ केजी) र सरस्वती रानाले ७५ केजीमुनि चुनौती पेश गर्नेछन् ।

यस्तै पुरुषतर्फ तेज बहादुर देउवा (४९ केजी), प्रेम चौधरी (५२ केजी), भुपेन्द्र थापा (६४ केजी), विष्णुप्रसाद घले (६९ केजी), मनोहर बस्नेत (८१ केजी) र आषिश दवाडीले ९१ केजीभन्दामाथि प्रतिस्पर्धा गर्नेछन् । खेलाडी छनोट राखेप च्याम्पियनसिप अन्तर्गत २७ औं पुरुष तथा आठौं महिला खुल्ला बक्सिङ प्रतियोगिताबाट गरिएको संघका अध्यक्ष राम अवालेले जानकारी दिए ।

मुख्य प्रशिक्षकमा प्रकाश थापामगर, प्रशिक्षक डम्मर दत्त भट्ट, सहायक प्रशिक्षक दिपक महर्जन, टिम व्यवस्थापकमा राम बहादुर गिरी, टिम सहायक व्यवस्थापकमा दिलिपा श्री अधिकारी र मिडिया अफिसरमा निशान राई रहेका छन् ।

प्रतियोगितामा विभिन्न १७ राष्ट्रहरुको सहभागिता रहने छ । प्रतियोगिताको लागि नेपाली टोलीले बिहान र बेलुका नियमित प्रशिक्षण गरेको संघले जनाएको छ ।

यस्तै बक्सिङ संघका अध्यक्ष राम अवाले, महासचिव सविन भट्टचार्य र सदस्य श्याम अवालेले दुवईंमा जनवरी २७ मा हुने आइवा एक्स्ट्रा अडिनरी कंग्रेसमा सहभागिता जनाउने छन् ।