काठमाडौं (हाम्रो खेलकुद) – न्यु डायमण्ड एकेडेमीकी तथा नेपाली राष्ट्रिय महिला भलिबल टोलीकी महत्वपूर्ण सदस्य प्रतिभा माली र त्रिभुवन आर्मी क्लबका तथा राष्ट्रिय पुरुष भलिबल टोलीका सदस्य मानबहादुर श्रेष्ठले एनभिए सिटी ट्राभल्स एण्ड टुर्स अवार्ड जितेका छन् ।

नेपाल भलिबल संघ (एनभिए) ले आयोजना गरेको एनभिए सिटी ट्राभल्स एण्ड टुर्स अवार्डमा प्रतिभा महिलातर्फ र मानबहादुर पुरुषतर्फ उत्कृष्ट हुँदै अवार्ड जित्न सफल भएको हो । अवार्ड जित्न सफल खेलाडीलाई राष्ट्रिय खेलकुद परिषदका सदस्य सचिव केशव कुमार विष्ट, संघका अध्यक्ष मनोरन्जनरमण शर्मा र सिटी ट्राभल्स एण्ड टुर्सका निर्देशक शिर बहादुर तामाङले अवार्ड वितरण गरे । उनीहरुले समान २५/२५ हजार रुपैया प्राप्त गरे ।

पुलिसका विशाल विके र महिलातर्फ पुलिसकै कामना विष्ट उदियमान खेलाडी घोषित भए । उनीहरुले समान १५/१५ हजार प्राप्त गरे । एपीएफका ज्ञानेन्द्र विष्ट महिलातर्फको र जगदिश प्रसाद भट्ट पुरुषतर्फको उत्कृष्ट प्रशिक्षक चुनिए । उनीहरुले समान २५/२५ हजार रुपैया प्राप्त गरे । महिलातर्फ नेपाल एपिएफ क्लब र पुरुषतर्फ त्रिभुवन आर्मी क्लब वर्षभरको उत्कृष्ट टिम घोषित भए । उनीहरुले समान ५०/५० हजार रुपैया प्राप्त गरे । सोही अवसरमा भलिबल संघसँग आबद्ध विभिन्न ४० क्लब र संघहरुलाई मायाको चिनो प्रदान गरिएको थियो ।