काठमाडौं (हाम्रो खेलकुद) – १३ औं संस्करणको ‘रेडबुल ढोरपाटन युएम महिला डबल लिग भलिबल’ प्रतियोगितामा पश्चिमाञ्चलको टप्स उच्च मावि पोखराले विजयी शुरुवात गरेको छ ।

तस्बिर : विवेक सुवेदी / हाम्रो खेलकुद

प्रतियोगिताको चौथो दिन चलिरहँदा टप्सले पहिलो खेलमा विभागीय त्रिभुवन आर्मी क्लबलाई ३–१ को सेटमा पराजित गर्दै प्रतियोगितामा विजयी शुरुवात गरेको हो । टप्समा राष्ट्रिय टोलीका उपकप्तान मञ्जु गुरुङ र अरुणा शाहीले खेलेका छन् । पहिलो सेट २५–१८ ले सहजै आफ्नो पक्षमा पारेको टप्सले दोस्रो सेट भने २१–२५ ले गुमाएको थियो । तर, त्यसपछिका दुवै सेट २५–२१ र २५–२१ ले आफ्नो पक्षमा पार्न सफल भयो ।

प्रतियोगिता अन्तर्गत आइतबार भएका अन्य खेलहरुमा लिगको शीर्ष स्थानमा रहेको नेपाल एपीएफ क्लब, शिवम् न्यु डायमण्ड एकेडेमीले आफ्नो अपराजित यात्रा कायमै राखे । एपीएफले चितवनको मेघौली स्पोर्टस् क्लबमाथि २५–५, २५–९ र २५–११ को सहज जित निकाल्यो । दोस्रो स्थानमा रहेको शिवम् न्यु डायमण्डले श्रीगाँउ स्पोर्टस् क्लब दाङमाथि २५–११, २५–१५ र २५–८ को सहज जित निकाल्यो । विभागीय नेपाल पुलिसले आइतबार दोहोरो जित दर्ता गर्न सफल भयो ।

पहिलो खेलमा पारामाउन्ट एकेडेमीलाई २५–१४, २५–८ र २५–८ ले पराजित गर्दा स्प्रिङडेलमाथि २५–१२, २५–१३ र २५–११ को सहज जित निकाल्यो । शिवम् न्यु डायमण्डसँग पराजित हुनुअघि श्रीगाँउ स्पोर्टस् क्लब दाङले थ्री स्टार एकेडेमीमाथि २५–१३, २५–३ र २५–१५ को सहज जित निकालेको थियो ।

प्रतियोगिता अन्तर्गत सोमबार ६ खेल हुनेछ । दिनको पहिलो खेलमा पूर्वाञ्चल क्षेत्रीय महिला भलिबल टोलीले थ्री स्टार एकेडेमी, नेपाल पुलिस क्लबले न्यु डायमण्ड स्पोर्टस् क्लब, शवम् न्यु डायमण्डले मेघौली स्पोर्टस् क्लब चितवन, टप्सले श्रीगाँउ स्पोर्टस् क्लब दाङ, नेपाल एपीएफ क्लबले पारामाउन्ट स्कुल र पूर्वाञ्चलले त्रिभुवन आर्मी क्लबसँग खेल्ने कार्यत्रलम छ ।