काठमाडौं (हाम्रो खेलकुद) – नेपाल भलिबल संघ (एनभिए)ले पहिलोपटक आयोजना गर्न लागेको एनभिए अवार्डका लागि सिटी ट्राभल्स एण्ड टुर्सको साथ पाएको छ ।

एभनिए र सिटी ट्राभल्सले अवार्डका लागि शनिबार ३ वर्षको लागि साढे १० लाख रकमको सम्झौता गरेको छ । सम्झौतामा एनभिएका अध्यक्ष मनोरन्जन रमण शर्मा र सिटी ट्राभल्सका निर्देशक शिर बहादुर तामाङले हस्ताक्षर गरे । अवार्ड कार्यक्रम सोमबार गरिने नेपाल भलिबल संघले जनाएको छ ।

अवार्ड खेलाडी, प्रशिक्षक, टिम, उदयीमान खेलाडी र विभिन्न जिल्ला, क्षेत्र र संघसंस्थालाई गरी ४८ वटा अवार्ड प्रदान गरिने जनाएको छ ।नेपाल भलिबल संघका महासचिव जितेन्द्र बहादर चन्दले अवार्ड सेरेमोनीमा महिला र पुरुषको ‘बेस्ट टिम अफ दी इयर, महिला र पुरुषको ‘बेस्ट प्लेअर अफ दि इयर’, महिला र पुरुषको ‘इमर्जिङ प्लेअर अफ दि इअर’ तथा महिला र पुरुषको ‘कोच अफ दि इअर’लाई अवार्ड प्रदान गरिनेछ ।

एनभिएले २०७३ सालमा आयोजना गरेको विभिन्न प्रतियोगिताको आधारमा भलिबल संघका उपाध्यक्ष निरोज मास्केको संयोजकत्वमा रहेको ७ सदस्यीय छनोट समितिले छनोट गरेका खेलाडीहरुलाई अवार्ड प्रदान गरिने चन्दले बताए ।

‘बेस्ट टिम अफ दि इअर’लाई समान ५०–५० हजार प्रदान गरिनेछ। यस्तै बेस्ट प्लेअर र बेस्ट कोचलाई २५–२५ हजार तथा इमर्जिङ प्लेअरलाई १५–१५ हजार प्रदान गरिनेछ । यस्तै एनभिएका सचिव जगदिश भट्टको संयोजनमा विभिन्न ४० जिल्ला, क्षेत्र र संघसंस्था छनोट गरी अवार्ड प्रदान गरिनेछ ।