काठमाडौं (हाम्रो खेलकुद) – न्यू डायमण्ड एकेडेमीको आयोजनामा ‘शिवम् न्यु डायमण्ड कप खुला महिला भलिबल प्रतियोगिता’ हुने भएको छ ।

प्रतियोगिता माघ २१ गतेबाट २३ गतेसम्म नयाँ बसपार्कस्थत ढोरपाटन स्पोर्टस क्लबको खेल मैदानमा हुने न्यू डायमण्ड एकेडेमीका प्रिन्सिपल तथा प्रशिक्षक कुमार राईले जानकारी गराए ।

न्यू डायमण्डलाई राष्ट्रिय स्तरको खेलाडी उत्पादन गर्ने एकेडेमीको रुपमा लिइन्छ । डायमण्डले रमिला ताण्डुकार, प्रतिभा माली, रेश्मा भण्डारी र कृपा अधिकारीजस्ता राष्ट्रिय टिमका खेलाडी उत्पादन गरिसकेका छन् । शिवम् सिमेन्टले न्यू डायमण्ड एकेडेमीलाई प्रतियोगिता आयोजना गर्न तथा अन्य सुविधाका लागि १ वर्षको लागि गत भदौमा मुख्य प्रायोजन गरेको थियो ।

सम्झौता अनुसार शिवम् सिमेन्टले न्यू डायमण्डलाई एक वर्षका लागि ८ लाख नगद सहयोग गर्नेछ । त्यसमा न्यु डायमन्डले आयोजना गर्ने एउटा प्रतियोगितामा शिवम सिमेन्ट मुख्य प्रायोजकको रुपमा रहने उल्लेख भएको थियो । प्रतियोगितामा १३ औं रेडबुल ढोरपाटन युएम महिला डबल लिग भलिबल प्रतियोगिताका शीर्ष ६ टोलीले प्रतिस्पर्धा गर्ने प्रशिक्षक राईले जानकारी गराए ।

प्रतियोगिताको विजेताले १ लाख ५१ हजार रुपैयासहित शिल्ड र मेडल प्राप्त गर्नेछन् । दोस्रो हुनेले १ लाख १ हजार र तेस्रो हुनेले ५१ हजार तथा चौथो हुनेले २१ हजार प्राप्त गर्नेछ । यस्तै व्यक्तिगत विधातर्फ सर्वोकृष्ट खेलाडीले १० हजार रुपैया प्राप्त गनृेछ । उत्कृष्ट स्पाइकर, सेटर, ब्लकर, क्विकर, सर्भर र डिफेन्डरले समान ५-५ हजार प्राप्त गर्ने आयोजकले जनाएको छ ।

प्रतियोगिताको लागि करिब ३४ लाख खर्च हुने आयोजकले अनुमान गरेको छ । प्रतियोगिताबाट बचेको रकम इन्डोर प्रशिक्षण हलका लागि जम्मा गरिने आयोजकले जनाएको छ ।