सुनसरी (हाम्रो खेलकुद) – इटहरीमा हुन गइरहेको १२ औं अन्तर्राष्ट्रिय खुला मैत्रीपूर्ण तेक्वान्दो च्याम्पियन्सिप (आईओएफटीसी) को सम्पूर्ण तयारी पूरा भएको आयोजकले जनाएको छ । प्रतियोगिता यही पुस १७ र १८ गते सुनसरीको इटहरी रंगशालाको नवनिर्मित कभर्डहलमा आयोजना हुँदै छ ।

बुधबार राजधानीमा आयोजित पत्रकार सम्मेलनमा आयोजक कमिटीका संयोजक राष्ट्र राईले च्याम्पियनसिपको सम्पूर्ण तयारी पूरा भएको बताए । प्रतियोगितामा १३ देशको सहभागिता पक्का भएको पनि पत्रकार सम्मेलनमा जनाइयो ।

च्याम्पियनसिपमा नेपाल लगायत भारत, बंगलादेश, अमेरिका, बेलायत, अष्ट्रेलिया, कम्बोडिया, मोरक्को, इतोपिया, घाना, नाइजेरिया र क्यानाडाको सहभागिता पक्का भइसकेको हो । कुल ५ सय खेलाडिको सहभागिता हुने अनुमान गरिएको आयोजक कमिटीका सचिव दिपेन्द्र दाहालले जनाए ।

च्याम्पियनसिपमा नेपालबाट ३ सय भन्दा बढि प्रतिस्पर्धी रहेको पनि बताइएको छ । च्याम्पियनसिपमा अत्याधुनिक खेल सामग्री प्रयोग गरिने आयोजकले जनाएको छ ।

त्यस्तै उत्कृष्ट महिला तथा पुरुष खेलाडिले ५० हजार नगद प्राप्त गर्ने छन् भने उत्कृष्ट महिला तथा पुरुष प्रशिक्षकलाई जनही २५ हजार प्रदान गरिने छ । यस प्रतियोगितालाई राष्ट्रिय खेलकुद परिषद् (राखेप) बाट ३० लाखको सहयोग पनि गरिएको छ ।