काठमाडौं (हाम्रो खेलकुद) – भैरहवा ग्लाडियटर्स राजधानीमा जारी टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगिताको प्ले अफमा प्रवेश गरेको छ । सोमबार भएको खेलमा पोखरा राइनोजलाई ७ विकेटले पराजित गर्दै भैराहवाले प्ले अफमा स्थान सुरक्षित गरेको हो ।

यसअघि विराटनगर वारियर्सले प्ले अफमा पुगिसकेको छ । अब प्ले अफमा दुई टोलीको टुङ्गो लाग्न बांकी छ । पोखराले दिएको १ सय ९ रनको लक्ष्य भैरहवाले १७.४ ओभरमा ३ विकेट गुमाएर पुरा गर्‍यो ।

भैरहवाको जितमा आरिफ शेखले ४८ रनको योगदान दिए । यस्तै कप्तान शरद भेषवाकरले ३२ रनको अविजित इनिङ्स खेले । शरद र आरिफ शेखले चौथो विकेटको लागि ७३ रनको साझेदारी गर्दै टिमलाई जित दिलाए । विराटनगरका ताज वालीले २ तथा कप्तान शक्ति गौचनले १ विकेट लिए ।

यसअघि त्रिवि क्रिकेट मैदान कीर्तिपुरमा टस जितेर पहिले ब्याटिङको गर्ने निर्णय लिएको पोखरा राइनोजले १८.३ ओभरमा सबै विकेट गुमाएर १ सय ८ रनको योगफल तयार गर्‍यो ।

तीन खेलाडीले मात्र दोहोरो अंक छुन सकेको पोखराका लागि इसरार उल्लाहले सर्वधिक ४१ रनको योगदान दिए । सुनिल धमलाले १५ रनमा आउट भए भने आसिफ अलि १० रनमा आउट भए । त्यस्तै सौरभ खनाल ९ रन र नुरधोज सेन ७ रनमा आउट भए ।

भैरहवाका लागि कप्तान शरद भेषवाकर, दिपेश श्रेष्ठ र कृष्ण कार्कीले समान २ विकेट लिए । हरि शंखर शाह, आसिफ अलि, प्रथम सलुंगी र पुनित मेहेराले एक एक विकेट लिए ।

लिग अन्तर्गत मंगलबार दुई खेल खेलिने छ । पहिलो खेलमा भैरहवाले चितवन टाइगर्ससँग खेल्दा दोस्रो खेल पोखरा राइनोज र ललितपुर प्याट्रियट्सबीच हुनेछ ।