काठमाडौं (हाम्रो खेलकुद) – टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगितामा विराटनगर वारियर्सले लिग चरणमा आफ्नो अपराजित यात्रा कायमै राखेको छ । सोमबार भएको खेलमा विराटनगरले काठमाडौं किङ्स इलेभेनलाई ८ रनले पराजित गर्दै लिग चरणमा आफ्नो अपराजित यात्रा कायमै राखेको हो ।

विराटनगरले दिएको १ सय ४८ रनको लक्ष्य पछ्याएको काठमाडौंले निर्धारित २० ओभरमा ९ विकेट गुमाएर १ सय ३९ रनमात्र बनाउन सक्यो । काठमाडौंका लागि कप्तान फरवेज महारुफले सर्वाधिक ४२ रनको योगदान दिए । नरेश बुढाऐर ३० रनमा आउट भए । ओपनर अमित श्रेष्ठ १७ तथा सिद्धान्त लोहनी १५ रनमा आउट भए । सागर पुन १३, सागर कुमार १२ रनमा आउट भए । अक्षु फर्नान्डो ३ रनमा आउट भए ।

विराटनगरका अंशुमन रथले ३ विकेट लिए । वसन्त रेग्मी र राम नरेश गिरीले समान २ विकेट लिए । करन केसी र पारस खड्काले पनि १-१ विकेट लिए । विराटनगरका अंशुमन रथ ‘म्यान अफ दि म्याच’ घोषित भए र १० हजार नगद प्राप्त गरे ।

यसअघि त्रिवि क्रिकेट मैदान कीर्तिपुरमा टस हारेर पहिले ब्याटिङको निम्तो पाएको विराटनगरले निर्धारित २० ओभरमा ७ विकेट गुमाएर १ सय ४७ रनको योगफल तयार गर्‍यो । विराटनगरका लागि बाबर हायातले सर्वधिक ६७ रनको योगदान दिए । अंशुमन रथ ३२ रनमा आउट भए भने कप्तान पारस खड्का २६ रनमा आउट भए । त्यस्तै अनिल शाह ९ रन र करण केसी ५ रनमा आउट भएका थिए ।

ओपनर आशिफ शेख शुन्य रनमा आउट भएका थिए । जितेन्द्र मुखियाको बलमा ६२ रनमा बाबर हायातको क्याच अक्षु फर्नान्डोले छुटाएका पनि थिए । काठमाडौंका सोमपाल कामी र अमरसिंह राउटेलाले समान २ विकेट लिएका थिए । कप्तान फरवेज महारुफ र जितेन्द्र मुखियाले एकएक विकेट लिए ।

लिगमा विराटनगर ५ खेलबाट १० अंकसहित शीर्ष स्थानमा छ भने २ अंकसहित काठमाडौं पाँचौ स्थानमा छ । लिग अन्तर्गत आज पोखरा राइनोज र भैरहवा ग्लाडियटर्सबीच खेद हुदैछ ।