काठमाण्डौं (हाम्रो खेलकुद) – फराकिलो अग्रता लिदै शुक्रबहादुर राई र प्रतिमा शर्पाले सिएमएस छैटौं सिएमएस फाल्डो सिरिज नेपाल च्याम्पियनसिपको उपाधि जित्ने सम्भावना मजबुद पारेका छन् ।

साविक विजेता समेत समेत रहेका शुक्रले यू २१ तर्फ मंगलबार ३ ओभर ७५ अंक जोड्दा समग्रमा ७ ओभर १ सय ५१ अंकका साथ शीर्षस्थानमा यथावत रहेका हुन् । अन्तिम १८ होलको खेल बाँकी रहँदा शुक्रले विपिन तामाङलाई ७ स्ट्रोकले पछि पारेका छन । शुक्रले पहिलो र दोस्रो होलमा बोगी खेपे ।

तेस्रो र चौथो होलमा बर्डी प्रहार गर्दा सातौ होलको ट्रिपल बोगीले फ्रन्ट नाईन ३ ओभर ३९ को प्रदर्शन रह्यो । त्यसपछि ११औ र १५औ होलमा एक एक सट खेर फालेपनि अन्तिम दुई होलमा बर्डीको सफलतासँगै ब्याक नाईन ईभन पार ३६ मा पुरा गरे।७ ओभर ७९ अंक जोडी समग्रमा १ सय ५८ अंकका साथ विपिन दोस्रो स्थानमा छन् । ९ ओभर ८१ अंक जोडी समग्रमामा १ सय ६८ अंक बनाएका सुरेश तामाङ तेस्रो स्थानमा छन् ।
छात्रातर्फ २२ स्ट्रोकको फराकिलो अग्रता सहित प्रतिमा उपाधिको नजिक पुगेकी छिन् । उनले १ ओभर ७३ को नतिजाकासाथ समग्रमा १० औभर १ सय ५४ अंक जोडेकी छिन् । यो स्कोरमा प्रतिमा कसमिरा शाहलाई २२ स्ट्रोकले पछि पारेकी छिन् । कसमिराले ८६ अंक जोड्दा समग्रमा १ सय ७६ अंककासाथ दोस्रो र जुनि गुरूङ समग्रमा १ सय ९३ अंककासहित तेस्रो स्थानमा छिन् ।

यू १६ तर्फ सुवास घिसिङ ५ ओभर ७६ अंक सहित समग्रमा १ सय ५६ अंकका साथ शीर्षस्थानमा उक्लेका छन । भारतीय खेलाडी मोनिष शाह १ सय ६० अंककासाथ दोस्रो र रितेश तामाङ १ सय ६१ अंक सहित तेस्रो स्थानमा छन् ।

४ छात्रा सहित २३ जुनियर खेलाडीको सहभागिता रहेको प्रतियोगिताको अन्तिम १८ होलको खेल बुधबार हुनेछ । नेपाल गल्फ संघ र गोकर्ण फरेष्ट रिसोर्टद्वारा आयोजित प्रतियोगिताका सबै तीन विजेताले भियतनाममा मार्चमा हुने फाल्डो सिरिज एसिया फाइनलमा छनोट हुनेछन् ।