काठमाडौं (हाम्रो खेलकुद) – आइसीसी विश्व क्रिकेट लिग (डब्लुसिएल) च्याम्पियनसिप अन्तर्गतको सातौं चरण खेल्न युएई भ्रमणमा रहेको नेपाली क्रिकेट टोलीले पहिलो अभ्यास खेलमा हार बेहोरेको छ ।  शुक्रबार दुबईमा भएको पहिलो अभ्यास खेलमा नेपाल अमेरिकासँग ५ विकेटले पराजित भएको हो ।

नेपालले दिएको ९० रनको झिनो लक्ष्य अमेरिकाले २२.३ ओभरमा ५ विकेट गुमाएर पूरा गर्यो । अमेरिकाको जितमा ओपनर सइद अब्दुल्लाहले ४४ रन बनाए । रोए सिल्भाले नटआउट २५ तथा तमिल पटेलले नटआउट ७ रन जोडे ।

ओपनिङ ब्याट्सम्यान सागर पटेल ३ रनमा सोमपाल कामीको एलबिडब्लूको धरापमा परेका थिए । इब्राहिम खालिल र रुनाल पटेल ४–४ रनमै पेभेलियन फर्के । बलिङतर्फ नेपालका सोमपाल कामी र सागर पुनले २–२ विकेट लिएका थिए ।

त्यसअघि टस हारेर पहिले ब्याटिङ गरेको नेपालले कमजोर ब्याटिङ गरेको थियो । नेपाल ३६.१ ओभरमा ८९ रनमै अलआउट हुन पुगेको थियो । नेपालका लागि बसन्त रेग्मीले सर्वाधिक २१ रन जोडे । दिलीप नाथले १६ रन जोडे भने दीपेन्द्रसिंह ऐरीले १२ तथा कुशल भुर्तेलले १० रन बटुले । अन्य ब्याट्सम्यानले दोहोरो अंकमा रन बनाउन सकेनन् ।

शरद भेषावकरको कप्तानीमा उत्रिएको नेपालले युवा खेलाडीलाई मौका दिएको थियो । दिलिपसँगै अनिलकुमार साह र कुशलले पहिलो रोजाइमा खेलेपछि ब्याटिङमा जम्म सकेनन् । कप्तान शरदसँगै अनिल शून्य रनमा आउट भएका थिए ।

नेपाललाई सस्तैमा समेट्ने क्रममा अमेरिकाका जापेन पटेलले ४ विकेट लिए । रोए सिल्भा र नोस्तुस केन्जीले २–२ विकेट हात पारे । अब नेपालले दोस्रो अभ्यास खेलमा आइतबार केन्यासँग प्रतिस्पर्धा गर्नेछ ।

डिभिजन–३ मा रहेको अमेरिकाको हालका प्रशिक्षक पुबुदु दासानायके हुन् । उनी नेपालका पूर्व प्रशिक्षक हुन् । डब्लुसिएल च्याम्पियनसिप अन्तर्गत नेपाल र युएईबीच मंसिर २० र २२ गते प्रतिस्पर्धा हुनेछ । खेल आबुधावीको शेख जायेद रंगशालामा हुनेछ । नेपालले युएईविरुद्धको खेललाई डिभिजन–२ को तयारीका रुपमा लिएको छ ।