दोस्रो पेप्सी ओपन गल्फ शनिबार

काठमाडौं (हाम्रो खेलकुद) – दोस्रो संस्करणको पेप्सी ओपन गल्फ शनिबार हुने भएको छ । एक दिने एमेच्योर गल्फ प्रतियोगितामा ९० खेलाडीले प्रतिस्पर्धा गर्नेछन् ।

बरुण बेवरेजको उत्पादन पेप्सीको मुख्य प्रायोजनमा हुन लागेको प्रतियोगिता शनिबार गोकर्ण गल्फ क्लबमा आयोजना हुने गोकर्ण गल्फ क्लबका सिनियर गल्फ निर्देशक दीपक आचार्यले पत्रकार सम्मेलनमार्फत जानकारी गराए ।

बरुण भेवरेजका बजार विकास म्यानेजर सुशिल रत्न तुलाधरले गल्फसँग जोडिन पाउनु कम्पनीको लागि ठुलो फाइदाको विषय रहेको बताए । उनले यो प्रतियोगिताको सहकार्यलाई निरन्तरता दिँदै जाने पनि बताए ।

प्रतियोगिता १८ होलमा स्टेबल फोर्ड फरम्याटमा ३/४ ह्याण्डीकयापमा हुनेछ । प्रतियोगिताको पुरुष विजेता, उपविजेता, महिला विजेता, सिनियर पुरुष विजेता र जुनियर विजेताले पुरस्कार प्राप्त गर्नेछन् । यस्तै बेष्ट ग्रस, लङ्गेष्ट ड्राइभ, क्लोसेस्ट टु दि पिनले पनि पुरस्कार प्राप्त गर्ने निर्देशक आचार्यले जानकारी गराए ।