काठमाडौं (हाम्रो खेलकुद) – प्रथम प्याब्सन यू–१८ राष्ट्रिय महिला तथा पूरुष भलिबलको तयारी पूरा भएको छ । आयोजक नेपाल विद्यालय भलिबल कमिसनले शुक्रबार पत्रकार सम्मेलनको आयोजना गर्दै प्रतियोगिताो सम्पूर्ण तयारी पूरा भएको जानकारी गराएको हो । प्रतियोगिता कात्तिक १२ गते सोमबारबाट कात्तिक १९ गतेसम्म हुदैछ ।

प्रतियोगितामा देशैभरबाट महिलातर्फ १६ र पूरुषतर्फ २३ गरी ३९ विद्यायलको सहभागिता रहेको छ । ३९ टिमबाट करिब ६ सय  खेलाडीले प्रतियोगितामा सहभागिता जनाउनेछन् । महिलातर्फको खेल नकआउटका आधारमा हुनेछन् भने पुरुषतर्फको खेल लिग कम नकआउटका आधारमा गरिने विद्यालय भलिबल कमिसिनका अध्यक्ष राम बहादुर केसीले जानकारी गराए ।

प्रतियोगिताको सबै खेलहरु नयाँ बसपार्कस्थित ढोरपाटन भलिबल प्रशिषण केन्द्रको कोर्टमा हुनेछ । यसै प्रतियोगिताबाट उत्कृष्ट २४ महिला र २४ पुरुष खेलाडी छनोट गरिने आयोजकले जनाएको छ । देशैभरबाट खेलाडी छानिने भएकाले आवश्यकता अनुसार अन्तर्राष्ट्रिय प्रतियोगिताको तालिका हेरी खेलाडीहरुलाई क्लोज क्याम्पमा राखिने आयोजकले जनाएको छ ।

कार्यक्रममा नेपाल भलिबल संघका अध्यक्ष मनोरन्जन रमण शर्मा र महासचिव जितेन्द्र बहादुर चन्दले विद्यालय भलिबल कमिसनका अध्यक्ष रामबहादुर केसीलाई प्रतियोगिताको लागि पाँच थान भलिबल र एक थान नेट हस्तान्तरण गरेको थियो । लिगका खेलहरु बेष्ट अफ थ्रीको आधारमा हुनेछ भने नकआउटका खेलहरु बेष्ट अफ फाइभका आधारमा हुनेछ ।

प्रतियोगिताको महिला र पूरुष दुवैतर्फको विजेताले समान १–१ लाख प्राप्त गर्नेछन् । यस्तै दोस्रो हुने दुवै टिमले समान ६०–६० हजार तथा तेस्रो हुने टिमले ३५–३५ हजार रुपैया प्राप्त गर्नेछन् ।

प्रतियोगितामा उत्कृष्ट हुने महिला तथा पुरुष दुवै खेलाडीले समान ५–५ हजार प्राप्त गर्नेछन् भने हरेक विधाका उत्कृष्टतर्फ बेस्ट स्पाइकर, सेटर, ब्लकर, सर्भर र डिफेन्सले तीन हजार रुपैयाँ प्राप्त गर्नेछन् । विधागत प्रतियोगिता सञ्चालनका लागि १३ लाख ५० हजार रुपैयाँ खर्च हुने अनुमान कमिसनको छ ।