लण्डन(एजेन्सी) – इङ्ग्लिस फुटबल लिग (इएफएल) कप अन्तर्गत आज राति चेल्सी अर्को प्रिमियर लिग टोली एभर्टनको सामना गर्दै छ । नेपाली समय अनुसार रातिको १२.३० बजे सुरु हुने यस खेल चेल्सीको घरेलु मैदान स्ट्यामफोर्ड ब्रिजमा खेलिने छ ।

आफ्ना मुख्य प्रशिक्षक रोनाल्ड कोम्यानलाई आर्सनल विरुद्धको ५-२ हारपश्चात बर्खास्त गरेको एभर्टन आज मुख्य प्रशिक्षक बिनै चेल्सीको सामना गर्ने छ । एभर्टनका लागी इड्रिसा गे आर्सनलसँग रातो कार्ड पाएकाले खेल्न प्रतिबन्धित छन् । रस बार्कली र सेमस कोलम्यान एभर्टनका लागी अझै घाइते छन् ।

अर्को तर्फ चेल्सीले भने यस साता वाटफोर्डमाथि ४-२ को रोमाञ्चक जित दर्ता गरेको थियो । चेल्सीका एन्गोलो कान्टे र भिक्टर मोसेस घाइते रहेका छन् भने मुख्य स्ट्राइकर एल्भारो मोराटालाई प्रशिक्षक एन्टोनियो कोन्टेले विश्राम दिई मिची ब्याटसुवयीलाई मौका दिने सम्भावना छ ।

त्यस्तै अर्को खेलमा टोटनह्याम हटस्पर वेस्ट ह्यामसँग भिड्दै छ । लिभरपुल माथिको ४-१ जितबाट ताजै रहेको टोटनह्यामले स्ट्राइकर ह्यारी केनलाई बिश्राम दिने सम्भावन छ । चोटग्रस्त रहेका डिफेन्डर ड्यानी रोजले यस खेलमा आगमन गर्न सक्ने छन् ।

वेस्ट ह्यामका लागि एन्डी क्यारोल प्रतिबन्धपछी टोलीमा फर्कँदै छन् । माइकल एन्टोनियो भने पुर्ण फिट नरहेकाले सुरुवात गर्ने सम्भावना कम रहेको छ । वेम्ब्लीमा खेलिने यस खेल आज राति १२.४५ बजे सुरु हुने छ ।