म्याड्रिड(एजेन्सी)– लुइस स्वारेजले खेलको अन्त्यतिर गोल गरेपछि गए राती ला लिगाको शीर्ष टोली बार्सिलोना र एट्लेटिको म्याड्रिडले १–१ को बराबरी खेलेका छन् । स्वारेजको गोलले बार्सिलोना अपराजित यात्रालाई कायम राख्न सफल भएको छ । अघिल्ला ७ खेल जितेको बार्सिलोनाको २२ अंक पुगेको छ ।

खेल सकिन ८ मिनेट बाँकी रहँदा स्वारेजले सर्जी रोर्बेटोको क्रसमा हेडमार्फत स्वारेजले बराबरी गोल गरेका थिए । त्यसअघि साउल निगुइजको गोलमा एट्लेटिकोले २१ औं मिनेटमा अग्रता लिएको थिए । बराबरीअघि बार्सिलोनाका स्टार लियोन मेसीको फ्रिकिक पोस्टमा लागेर फर्केको थियो ।
बराबरीपछि बार्सिलोना र रियाल म्याड्रिडबीच ५ अंकको फरक भएको छ । शनिबारनै रियलले गेटाफेलाई २–१ ले हराएको थियो । १६ अंकसहित एट्लेटिको दोस्रो स्थानमा छ । अक्टुबर १ मा क्याटान स्वतन्त्रताको जनमत संग्रहपछि बार्सिलोना पहिलो पटक स्पेनको राजधानी पुगेको थियो ।

स्पेनिस झन्डासहित सयौंको संख्यामा एट्लेटिकोका समर्थक रंगशालामा उपस्थित थिए । जसले बार्सिलोना र स्पेनिस टोलीका रक्षक जेरार्ड पिकेले हरेक पटक बल छुँदा गिज्याएका थिए । पिकेले जनमत संग्रहको समर्थक गर्दै आएका थिए ।

६८ हजार दर्शक क्षमता भएको वान्डामा बार्सिलानाका समर्थकलाई प्रतिबन्ध गरिएको थियो । विना समर्थक बार्सिलोनाले खेल्नु परेको यो दोस्रो खेल हो । लास पाल्मासविरुद्ध घरेलु मैदानमा भएको खेल विना दर्शक खेलाइएको थियो ।