काठमाडौं (हाम्रो खेलकुद)– राष्ट्रिय महिला भलिबल खेलाडी प्रतिभा माली तीन साताको प्रशिक्षणका लागि आज नेदरल्यान्ड्स जाने भएकी छन् । नेदरल्यान्ड्स भलिबल संघका प्रबन्धक पिटर भान तरेलको निमन्त्रणमा उनी त्यसतर्फ जान लागेकी छिन् ।

साहस स्पोर्टसले प्रतिभालाई एक कार्यक्रमका बीच आज विदाइ गरेको छ । खेलकुद पोशाक उत्पादक कम्पनी साहसले झन्डै दुई महिनाअघि प्रतिभालाई आफ्नो ब्रान्ड एम्बासडर नियुक्त गरेको थियो । साहस स्पार्टसका अध्यक्ष एवंम् प्रबन्धक निर्देशक जनक न्यौपाने, नेपाल भलिबल संघका उपाध्यक्ष रन्जन खड्का, कोषाध्यक्ष सुनकेशरी माली र न्यू डायमन्ड एकेडेमीका प्रशिक्षक कुमार राईले विदाइ गरे ।

माल्दिभ्सको क्लबबाट व्यावसायिक भलिबलको अनुभव बटुलिसकेकी उनले युरोपमा लिने प्रशिक्षणबाट खेल स्तरमा अझै निखार आउने आफुले विश्वास लिएको साहस स्पोर्टसका प्रबन्ध निर्देशक न्यौपानेले बताए ।

प्रतिभाले भलिबल संघ, समर्थक, प्रशिक्षकलगायत सबैको प्रेरणाले आफु यहाँ पुग्न सफल भएकोले सबैलाई धन्यवाद दिदै प्रशिक्षणले खेल स्तरमा अझै सुधार हुने विश्वास व्यक्त गरिन् । भलिबल संघका उपाध्यक्ष खड्काले प्रतिभाले प्राप्त गरेको अवसरले नेपाली भलिबललाई नै फाइदा पुग्ने विश्वास व्यक्त गरे ।

न्यू डाइमन्डका प्रशिक्षक राईले प्रतिभाको प्रशिक्षणका लागि संयोजनको भूमिका निर्वाह गरेकामा भलिबल संघ र अवसर जुटाइदिने नेदरल्यान्ड्स भलिबल संघलाई धन्यवाद दिए ।

तरेलसँगै केही महिना अघि नेपाल आएका म्याट भान विजल भ्रणमका दौरान प्रतिभावको खेल देखेर प्रभावित भएको थियो । प्रतिभाको प्रशिक्षणको सबै खर्च नेदरल्यान्ड्स भलिबलले बेहोर्ने बताइएको छ ।

गत महिना युवा तथा खेलकुद मन्त्रालयले राष्ट्रिय प्रतिभा सम्मानबाट प्रतिभालाई सम्मान गरेको थियो । उनी गत महिना नै नेपाल खेलकुद पत्रकार मञ्चले आयोजना गरेको पल्सर स्पोर्टस अवार्डको वर्षका उत्कृष्ट खेलाडी महिनाको मनोनयनमा समेत परेकी थिइन् । प्रतिभा असोज ३० गते स्वदेश फर्कनेछिन् ।