काठमाडौं (हाम्रो खेलकुद)– नेपाली गल्फर टंकबहादुर कार्कीले भुटान एमेच्योर गल्फ च्याम्पियनसिपको उपाधि जितेका छन् । पार ७० को थिम्पु गल्फ क्लब अन्तिम दिन आइतबार ५ अन्डर ६५ को प्रदर्शन गरेका टंकले ८ स्ट्रोकको अग्रतासहित उपाधि जितेका हुन् ।

टंकले समग्रमा ३ अन्डर २ सय ७७ को कार्ड बनाएका थिए । अन्तिम दिन १ अन्डर ६९ को कार्ड बनाएका आयोजक भुटानका जीवाङ गुरुङले समग्रमा ५ ओभर २ सय ८५ को का प्रदर्शन गरे ।

अर्का नेपाली सुकबहादुर राई १० ओभर २ सय ९० को प्रदर्शन गर्दै तेस्रो भएका छन् । उनले अन्तिम दिन पार ७० को कार्ड बनाएका थिए । भुटान राष्ट्रिय टोलीका सदस्य तेसेन्द्र दोर्जी चौथो ( २९३ ), नोर्बु एल छिरिङ (३१२) पाँचौं भए ।

टिम च्याम्पिनसिप पनि नेपाली टोलीले नै जितेको छ । अन्तिम दुई चरणमा टंक र सुकबहादुरले कुल २ सय ८० को प्रदर्शन गरेपछि नेपाल उपाधि जित्न सफल भएको थियो । भुटानका कर्मा छिरिङ र जिवाङ गुरुङ २ सय ९० स्कोरका साथ दोस्रो भए । त्यस्तै आयोजकै तेसेन्द्र दोर्जी र बिबि गुरुङ (३०७) को टोली तेस्रो भयो ।

नेपाल गल्फ संघका अध्यक्ष तासी घलेका अनुसार नेपाल, भुटान, बंगलादेश र अफगानिस्तानका गरि च्याम्पियनसिपमा ७० खेलाडीको सहभागिता थियो । अध्यक्ष घले टंकको प्रदर्शनबाट निकै खुसी भए । उनले भने, ‘टंकले आज जस्तै खेले भने उनले दक्षिण एसियाली खेलकुदमा स्वर्ण जित्नुका लागि एसिया पेसिफिक टुरमा पनि राम्रो प्रतिस्पर्धा दिन सक्छन् ।’