काठमाडौं (हाम्रो खेलकुद) – राष्ट्रिय भलिबल खेलाडी प्रतिभा मालीले युरोपमा प्रशिक्षण गर्ने अवसर पाएकी छिन् । माल्दिभ्सको क्लबबाट व्यावसायिक भलिबलको अनुभव समेत बटुलिसकेकी प्रतिभालाई नेदरल्यान्ड्समा तीन साताको इन्टर्नसिपका लागि निमन्त्रणा प्राप्त भएको नेपाल भलिबल संघका महासचिव जीतेन्द्रबहादुर चन्ले हाम्रो खेलकुद डटकमलाई जानकारी दिएका छन् ।

नेदरल्यान्ड्स भलिबल संघले प्रतिभालाई प्रशिक्षणको लागि मौका दिन लागेको हो । ‘हामीले आफ्नै खर्चमा खेलाडीलाई युरोप पठाएर प्रशिक्षण गर्ने भनेको अहिलेको लागि कल्पना मात्रै हो ’ महासचिव चन्दले भने, ‘त्यसले प्रतिभाका लागि जुन अवसर मिलेको छ , व्यक्तिगत रुपमा उनलाई त फाइदा पुग्छ नै । त्योसँगै नेपालको महिला भलिबल टोलीमै त्यसको प्रभाव पर्नेछ । हाम्रो स्तर उन्नतीमा पनि यसले मद्दत गर्नेछ । ’

केही महिनाअघि नेपाल भ्रमणमा आएका नेदरल्यान्ड्स भलिबल संघका विकास प्रबन्धक पिटर भ्यान तरेलले प्रतिभाका लागि निम्ता पठाएका हुन् । न्यू डायमण्ड एकेडेमीकी खेलाडी प्रतिभाले त्यहाँ रहँदा व्यावसिायक प्रशिक्षण प्रदान गर्ने प्राविधिक कार्यक्रममा भाग लिन पाउने बताइएको छ । त्यहाँ रहँदाको प्रतिभाको सबै खर्च नेदरल्यान्ड्स भलिबल संघले नै बेहोर्ने बताइएको छ ।

तरेलसँगै नेपालको राष्ट्रिय पुरुष टोलीलाई प्रशिक्षण दिन आएका म्याट भान विजल नेदरल्यान्ड्समा प्रतिभाको संरक्षक हुनेछन् । विजल नेपालमा रहँदा प्रतिभाको प्रदर्शनबाट निकै प्रभावित भएका थिए । नेपालको भलिबलमा सहयोग गर्ने विषयमा तरेल र भलिबल संघबीच सम्झौता पनि भएको थियो ।

सहास स्पोर्टसकी ब्रान्ड एम्बासडर समेत रहेकी प्रतिभालाई केही दिनअघि युवा तथा खेलकुद मन्त्रालयले राष्ट्रिय प्रतिभा सम्मान प्रदान गरेको थियो । उनी नेपाल खेलकुद पत्रकार मञ्चको आयोजनामा सोमबार हुने पल्सर स्पोर्टस अवार्डको उत्कृष्ट युवा खेलाडी विधाको मनोनयनमा पनि छिन् ।