काठमाडौं (हाम्रो खेलकुद) – नेपालले बंगलादेशसँगको मैत्रीपूर्ण भलिबल श्रृखंला २–० ले जितेको छ । ललितपुरको लगनखेल स्थित नेपाली सेनाको शारिरिक तालिम तथा प्रशिक्षण केन्द्रको कर्भडहलमा बुधबार भएको दोस्रो तथा अन्तिम खेलमा नेपालले बंगलादेशलाई ३–२ ले हराउँदै घरले कोर्टमा श्रृखंला जितेको हो । पहिलो खेल मंगलबार नेपालले ३–१ ले जितेको थियो ।

पहिलो खेलमा जस्तै दोस्रो खेलमा पनि नेपाली टोलीको रिसिभ कमजोर रह्यो । बंगलादेशी खेलाडीको सहज सर्भिसमा पनि नेपाली खेलाडीले रिसिभ खराब गरे । नेपालले सेटमा अग्रता बनाउँदा नेगेटिभ पोइन्टबाट सेट पछि परे । समग्रमा नेपाली खेलाडीबीच तालमेलको निकै अभाव देखिएको थियो ।

नेपाली टोलीले स्पाइककै भरमा पाँचौँ सेटमार्फत जित निकाल्यो । पहिलो मैत्रीपूर्णमा जित निकालिसकेको नेपाली टोलीले सहजै खेल आफ्ना पक्षमा पार्ने आंकलन गरिएपनि घरेलु टोलीले निरासलाग्दो प्रदर्शन गरे । तर नेपाली टोलीका प्रशिक्षक जगजिश भट्टले अनुमान गरे जस्तो खेल सहज भएन । उनले सोझो सेटमा जित्ने अनुमान गरेका थिए । तर , टोलीले अन्तिम सम्म संघर्ष गरेर जित हासिल गरेको थियो ।

नेपालले खेल अन्तत ः १९–२५, २५–२३,२०–२५,२५–२२ र १५–८ ले जितेको थियो । नेपालका लागि कुलबहादुर थापाले पुनः उत्कृष्ट प्रदर्शन गरे । उनले कुल २८ अंकको महत्वपूर्ण योगदान दिएका थिए । कुलबहादुर असफल हुदा ८ अंक बिपक्षले प्राप्त गरेको थियो । नेपालका अन्य स्पाईकरले दोहोरो अंक छुन सकेनन् । यद्दपी सेटरको रुपबाट कप्तान इम रानाले पनि उत्कृष्ट प्रदर्शन गरेका थिए । ।

नेपालका लागि निकै आशा गरिएको स्पाइकर मानबहादुर श्रेष्ठको प्रदर्शन सन्तोषजनक हुन सकेन । पाचौँ सेटमा बंगलादेशी खेलाडीले नेपाली रेफ्री चन्द्रा बन्दना राईको निणयमा पटकपटक असन्तुस्टी जनाए । खेलपश्चात बंगलादेशका प्रशिक्षक अलि पौउर एरोजीले प्रतिक्रिया समेत दिन मानेनन् । नेपालका प्रशिक्षक जगदिश भट्टले नेपाली खेलाडीले आशा गरे अनुरुप प्रदर्शन गर्न नसकेको बताए ।

उनले भने‘ पहिलो सेटमा हाम्रा खेलाडीको रिसिभ निकै खराब रह्यो । त्यसैले पहिलो सेट गुमाएपछि थप दबाब परे । त्यसमा बंगलादेशी खेलाडीले पनि हिजो भन्दा निकै राम्रो प्रदर्शन गरे । यद्यपि,हामी समालियौँ । त्यसैले जित आत्मसात ग¥यौँ ।’ नेदरल्यान्ड्स प्रशिक्षकबाट एक महिने प्रशिक्षण लिएको नेपाली टोलीले यसअघि डेनमार्कको घरेलु क्लबसँगको मैत्रीपूर्ण खेलमा समेत जित निकालेको थियो ।

नेपाली पुरुष भलिबल टोलीको स्तरबृद्धि र नियमित तयारीका लागि नेपाल भलिबल संघको आग्रहमा बंगलादेशको टोली मैत्रीपूर्ण खेलका लागि नेपाल आएको हो । सरकारले जेठमा भलिबललाई राष्ट्रिय खेलको मान्यता दिएपछि मैत्रीपूर्ण खेल तय गरेको थियो । यो सँगै नेपालले अहिले सम्म बंगलादेशसँगका ५ मध्ये ४ खेलमा जित दर्ता गरेको छ भने अर्को एउटामा हार बेहोरेको थियो ।